"Монгол Улсад дижитал соёлын нөөцийн удирдлагын систем байгуулах, соёлын контент бүтээх чадавхыг бэхжүүлэх төсөл"-ийн ээлжит сургалт энэ сарын 22-28-нд  БНСУ-д болж байна. 

Монгол Улсын ССАЖЗЯ болон БНСУ-ын Азийн соёлын төв хамтран хэрэгжүүлж буй уг төсөл нь 2025-2028 он хүртэл үргэлжилнэ. 

Уг төслийн хүрээнд соёлын өвийг дижитал хэлбэрт шилжүүлэх "Цахим архивын төв"-ийг Соёлын өвийн үндэсний төвийн дэргэд байгуулна. Солонгосын талаас 60 сая воны өртөг бүхий цахим архивын тоног төхөөрөмжийг хандивлаж, ирэх наймдугаар сард нээхээр төлөвлөжээ. Ингэснээр манай улсын түүх, соёлын нөөцийг олон улсын стандартад нийцүүлэн баримтжуулж, урт хугацаанд найдвартай хадгалж хамгаалах боломж нэмэгдлээ.

Төслийн гүйцэтгэгчээр БНСУ-ын Чоннамын их сургуулийн баг ажиллаж байна. Үндэсний өвийг олон улсад сурталчлах, технологийн дэвшлийг ашиглан соёлын контент бүтээх хүний нөөцийг бэлтгэх, чадавхжуулахад чухал түлхэц болж буйгаараа онцлог төсөл юм.

Сургалтад ССАЖЗЯ, Үндэсний музей, Үндэсний номын сан, Соёлын өвийн үндэсний төвийн нийт 15 албан хаагч хамрагджээ. Тэд түүхэн өвийг цахимжуулах 2D, 3D технологи, зураг үүсгэгч хиймэл оюун ухаан (AI) ашиглан контент бүтээх практик аргачлалд суралцаж, цахим удирдлагын нэгдсэн портал (GLAM 2.0)-ийн бүтэцтэй танилцан ур чадвараа дээшлүүлэв.

Азийн соёлын төвийн Гүйцэтгэх захирал Ким Сан Үг Монгол Улс, БНСУ-ын хамтын ажиллагаа жил ирэх тусам өргөжин тэлж байгаад сэтгэл ханамжтай байгаагаа илэрхийллээ.

ССАЖЗЯ-ны Соёл, урлагийн бодлого зохицуулалтын газрын дарга Д.Наранцэцэг "Энэхүү төсөл нь Монголын түүх, соёлын нөөцийн мэдээллийг дэлхий нийтэд хүртээмжтэй хүргэх, бүх нийтийн соёлын боловсролыг дээшлүүлэхэд бодит үр дүнгээ өгнө гэдэгт итгэлтэй байна" гэжээ.

Эх сурвалж: ССАЖЗЯ