Монгол Улсын Ерөнхийлөгч Халтмаагийн Баттулга Тулгар төрийн 2226 жил, Их Монгол Улс байгуулагдсаны 811, Ардын хувьсгалын 96 жилийн ой, үндэсний их наадмыг нээн үг хэлж, баяр наадмын нээлтийн ёслол, хүчит бөхийн барилдааны нэгийн давааны эхлэлийг үзэж сонирхсоныхоо дараа сурын талбайд зочилж эрхий мэргэн харваачид, тэнд хуран цугларсан наадамчин олонтой мэндчиллээ.

Баяр наадмаар Төрийн гурван өндөрлөг сур, шагайн талбайд зочилж гурван сум тавьдаг уламжлалтай. Төрийн тэргүүн өчигдөрхөн тангаргаа өргөж, энэ жилийн наадмаар сур харвах бэлтгэл хийж чадаагүй учир сур харвасангүй.   

Сурын талбайд зочлох үеэрээ Ерөнхийлөгч наадамчин олонд хандаж “Би дөнгөж өчигдөр Ерөнхийлөгчийн тангаргаа өргөөд өнөөдөр наадмаа нээлээ. Сайхан наадацгаагаарай. Баярлалаа, та бүхэнд” гэлээ. 

Үүний дараа тэрбээр шагайн асарт саатаж шагай харвалаа. Энэ үеэрээ Монгол Улсын Ерөнхийлөгч шагайн харваачдад мэндчилгээ дэвшүүлж, сайхан наадахын ерөөл дэвшүүлэв.

Гэрэл зургийг Д.Жавхлантөгс