Нийслэлийн Засаг даргын захирамжаар Z үеийн төлөөлөл Чинбатын Төгсдэлгэрийг Улаанбаатар хотын Ерөнхий архитектороор томилсноо хотын дарга Х.Нямбаатар танилцуулав.

Ч.Төгсдэлгэр нь “Шинэ Монгол” дунд сургуулийг дүүргэж, Япон улсын Ёкохамагийн үндэсний их сургуульд магистр, докторын зэрэг хамгаалсан. Хот төлөвлөгч, хотын нийтийн тээврийн чиглэлээр мэргэшсэн, судлаач бүсгүй. 

2023 оны зургаадугаар сард Ёкохамагийн их сургуульд Хотын нийтийн тээврийн чиглэлээр докторын зэрэг хамгаалсан. Тэрбээр Нийслэлийн Засаг даргын тамгын газар болон Япон улсын томоохон компаниудад хот байгуулалт, нийтийн тээврийн чиглэлээр ажиллаж байсан туршлагатай.

Өнөөдрийг хүртэл Токио дахь Дэлхийн банкинд хот төлөвлөлтийн зөвлөхөөр ажиллаж байгаад Нийслэлийн Засаг даргын урилгаар төрөлх Улаанбаатар хотынхоо хөгжилд мэдлэг, боловсролоо зориулахаар иржээ.