Нийслэлийн Баянзүрх дүүргийн 26 дугаар хороо, “Дүнжингарав” худалдааны төвийн ойролцоох замд 2024 оны нэгдүгээр сарын 25-ны шөнө хүнд даацын автомашин, “Патрол” маркийн суудлын автомашинтай мөргөлдсөн зам тээврийн осол гарсан.

Ослын улмаас хүнд даацын автомашинд тээвэрлэж явсан шингэрүүлсэн хий дэлбэрч тухайн орчинд явганаар болон тээврийн хэрэгслээр зорчиж явсан дөрвөн иргэнээс гадна галыг унтраахаар очсон онцгой байдлын байгууллагын гурван албан хаагч амиа алдсан. Мөн ойр орчинд нь байрладаг орон сууц галд өртөж, оршин суугчид орон гэргүй болж түрээсийн байранд амьдарч байна.

Осол гарснаас хойш 9 сарын хугацаа өнгөрчээ. Хэргийг цагдаагийн байгууллагад шалгаж буй. Албаны эх сурвалжийн сүүлд өгсөн мэдээллээр энэ осол, хэрэгт холбогдуулан хоёр хүнийг яллагдагчаар татжээ. Гэвч хэргийг прокурорт шилжүүлэх хараахан болоогүй байгаа аж. 

Эргэн сануулахад, шингэрүүлсэн хий тээвэрлэж явсан хүнд даацын автомашин “Дашваанжил” ХХК-ийн эзэмшлийнх бөгөөд жолооч мөн тус компанийн ажилтан. Осол гарсны дараа тус компанийн захирал Н.Баатаржав ажилтныхаа тухай “Манай жолооч 62 настай, маш туршлагатай. Манай компанид 2019 оноос ажилд орсон архи, тамхи хэрэглэдэггүй онц тээвэрчин байсан” гэж тодотгож байв.  https://gogo.mn/r/315132?i=

Харин "Патрол" маркийн суудлын автомашины талаар Мөрдөн байцаах албаны дарга хурандаа Н.Мишигдорж “Батлан хамгаалах яамны албаны машин байсан. "Дашваанжил" компани буруутай эсэх, хоёр жолоочийн аль нь буруутай гэдгийг мөрдөн байцаалтын үйл ажиллагаагаар тогтоохоор ажиллаж байна" гэж мэдээлж байлаа. Албан бус эх сурвалж тухайн автомашины жолооч ч мөн Батлан хамгаалах яамны ажилтан байсныг мэдээлсэн. https://gogo.mn/r/dwkjx

Энэ ослын улмаас хохирсон, галд орон сууц нь өртсөн иргэн Г.Ганчимэг “Хэрэв хуулийн байгууллага буруутныг тогтоогоод өгчихвөл буруутнаас эд хөрөнгөө, хохирлоо нэхэмжилж, нөхөн төлүүлмээр байна. Гэвч буруутай этгээдийг 9 сарын турш мөрдөөд олж тогтоож чаддаггүй цагдаатай улсад амьдарч байгаадаа гомдолтой байна” гэж ярьсан юм. https://gogo.mn/r/gn1g5