Дорноговь аймгийн Сайншанд сумын сурагч Д 2023 оны аравдугаар сарын 3-ны өдөр алга болсон. Түүнийг Г гэгч этгээд автомашиндаа суулган авч явж, эзгүй газарт аваачин хөнөөсөн хэрэг гарсан. Түүнд бүх насаар нь хорих ял оноосон юм. Талийгаач охины өмгөөлөгч мэдээлж байна. 

Талийгаач охины өмгөөлөгч: Бүх насаар нь хорих шийтгэл оногдуулсан ялтны хохирогчийн эрх зүйн байдлыг дордуулсан хууль үйлчилж байна гэж миний бие үзэж байна. 2022 оноос эхлэн Засгийн газрын тусгай сангийн тухай хууль үйлчилж байна. Энэ хүрээнд хохирогчийн оршуулгын зардлыг тухайн сангаас гаргуулахаар шийдвэрлэсэн. Харин сэтгэл санааны хохирлыг тусгай сангаас гаргах боломжгүй болоод байгаа юм. 

Тусгай сангийн тухай хуульд сэтгэл санааны хохирол гэдэг асуудлыг гаргаж ирэх хэрэгтэй байна. Бүх насаараа хорих ял эдэлж буй цөөн тооны ялтан байдаг. Хохирогчийн эрх зүйн байдлыг дээшлүүлэх зорилгоор энэ заалтыг нэмж оруулах шаардлагатай байна. 

Дорноговь аймгийн 12 настай талийгаач охины хувьд сэтгэл санааны хохирлыг төлүүлэхээр болсон. Ингэхдээ хөдөлмөрийн хөлсний доод хэмжээг 150 дахин нэмэгдүүлнэ гэсэн заалт бий. Үүн дээр насжилтын асуудлыг давхар тооцсон. Өөрөөр хэлбэл Дорноговь аймагт дундаж насжилт 72 бөгөөд энэ хугацааны мөнгийг давхар тооцуулсан буюу 182 сая гаруй төгрөгийг сэтгэл санааны хохиролд ялтан Гантулгаас гаргуулах шийдвэр гарсан. 

Гэтэл бүх насаараа хоригдож буй ялтан энэ хохирлын төлбөрийг төлөх боломжгүй. Иймд тусгай сангаас сэтгэл санааны хохирлын төлбөрийг гаргуулдаг байя гэсэн байр суурьтай байгаа юм. Бид сэтгэл санааны хохирлын төлбөрийг ялтнаас гаргуулна гэсэн цаастай л үлдлээ гэв.