БНХАУ-ын Тяньжин хотноо Шанхайн хамтын ажиллагааны байгууллага /ШХАБ/-ны дээд хэмжээний чуулга уулзалт хоёр өдрийн турш үргэлжиллээ. 

Энэ уулзалтыг нээхдээ БНХАУ-ын дарга Ши Жиньпин ШХАБ нь олон улсын харилцааны шинэ хэлбэрийн загварыг тогтоосон хэмээн онцолсон юм.

ОХУ-ын ерөнхийлөгч Владимир Путин, Энэтхэгийн ерөнхий сайд Нарендра Моди тэргүүтэй 20 гаруй орны удирдагчид энэ уулзалтад оролцлоо.

Мөн энэ үеэр БНХАУ болон Энэтхэг улсуудын хооронд олон жил үргэлжилсэн хурцадмал харилцаа, хилийн маргааны дараа талуудын харилцаа сайжирч буйг онцлов.

Ши Жиньпин Модид “Хятад, Энэтхэг хоёр өрсөлдөгч бус түнш байх ёстой” гэж мэдэгдсэн бол Моди талуудын хооронд “Энх тайван, тогтвортой байдлын уур амьсгал бүрдсэн” гэсэн байна.
АНУ-ын ерөнхийлөгч Дональд Трамп Энэтхэгийг ОХУ-аас газрын тос худалдан авсаар буйтай холбогдуулан Энэтхэгийн бараанд өндөр татвар тогтоосон.

АНУ, Энэтхэгийн харилцаа суларч буй энэ үед Моди БНХАУ-тай харилцаагаа гүнзгийрүүлэхийг эрэлхийлж байна.

БНХАУ болон Энэтхэг нь хүн амын тоогоор бусад улсыг тэргүүлдгээс гадна эдийн засгийн хувьд ч томоохон гүрнүүдийн тоонд багтдаг юм.

Мөн Моди 2020 онд Гималайн хил дээрх мөргөлдөөний улмаас хоёр улсын хооронд зогсоогоод байсан нислэгийг дахин сэргээхээ зарлажээ.

Эх сурвалж: ВВС