Дэлхийн түүхэд хоёрдугаар сарын 11-нд болсон онцлох гурван үйл явдлыг танилцуулъя.

1929 оны хоёрдугаар сарын 11. Ватикан хот улс тусгаар тогтнов

Италийн Ерөнхий сайд Бенито Муссолини, Ватиканы төрийн нарийн бичгийн дарга Пьетро Гаспарри нар 1929 оны хоёрдугаар сарын 11-нд Латераны гэрээг үзэглэснээр Ватикан хот дахь папын бүрэн эрхийг хүлээн зөвшөөрсөн.

Тухайн үед Италийн хаант улсыг Гуравдугаар Виктор Эмануэл, Ватикан хот улс буюу "Holy See - Ариун сэнтий"-г Ромын пап арваннэгдүгээр Пиус удирдаж байв.

Гэрээний дагуу Ватикан хот нь тусгаар улс болохыг хүлээн зөвшөөрсөн. Дэлхий даяарх католик сүмүүдийн шашны үйл ажиллагааг удирдаж, папуудыг томилдог Holy See-гийн удирдагч Ромын Пап нь дэлхийн католик шашны тэргүүн юм.

1970 оны хоёрдугаар сарын 11. Япон улс анхны хиймэл дагуулаа хөөргөв

Япон Улс "Ohsumi" хэмээх анхны хиймэл дагуулаа 1970 оны хоёрдугаар сарын 11-нд зүүн эргийн Охсүми хойг дахь Кагошима буюу Үчиноүра сансрын станцаас хөөргөсөн.

Японы эзэнт гүрэн байгуулагдсаны ойн өдөр болсон уг явдал Японыг АНУ, ЗХУ, Францын араас сансарт гарсан дөрөв дэх улс болгожээ. Японы эзэнт гүрэн НТӨ 660 оны хоёрдугаар сарын 11-нд байгуулагдсан.

Хиймэл дагуулыг Токиогийн их сургуулийн Сансар болон нисэхийн шинжлэх ухааны хүрээлэнд бүтээсэн "Lambda 4S-5" пуужингаар хөөргөжээ. Тус хүрээлэн нь өдгөө JAXA буюу Японы Сансар судлалын агентлагийн нэг хэсэг болсон.

1990 оны хоёрдугаар сарын 11. Нельсон Мандела суллагдав

Өмнөд Африк дахь арьс өнгөөр ялгаварлан гадуурхах үзлийн эсрэг апартеид хөдөлгөөний тэргүүн Нельсон Мандела 1990 оны хоёрдугаар сарын 11-нд шоронгоос суллагджээ.

Түүнийг 1961 онд эх орноосоо урвасан, 1962 онд хууль бусаар хил гарсан, 1964 онд хорлон сүйтгэсэн хэргээр тус тус баривчилж бүх насаар нь хорих ял оноосон.

Мандела 18 жилийг Роббен арлын шоронд хүнд хөдөлмөр эрхлэн өнгөрөөсөн бөгөөд хорих газрын нөхцөлийг сайжруулахад хүргэсэн байна. 1989 онд Өмнөд Африкийн Ерөнхийлөгч болсон Ф.В де Клерк апартеид хөдөлгөөнийг зогсоохын тулд Манделаг суллажээ.

Мандела апартеид хөдөлгөөний хурцадмал байдлыг зогсоож 1993 онд Нобелийн энх тайвны шагналыг хүртсэн бөгөөд ANC намыг удирдан 1994 онд Өмнөд Африкийн Ерөнхийлөгч болсон.