2023 оны Нобелийн энх тайвны шагналыг Иран улсад эмэгтэйчүүдийн эрхийг дарангуйлж буй дэглэмийн эсрэг тэмцсэн хүний эрхийн тэмцэгч Наргис Мохаммади хүртлээ.

Наргис Мохаммадид "Ираны засгийн газрын дэглэмийн эсрэг, хүн бүрийн тэгш эрх, эрх чөлөөний төлөө тэмцсэнийхээ төлөө" Нобелийн Энх тайвны шагнал хүртлээ гэж Стокгольм дахь Каролинскийн хүрээлэнгийн Нобелийн зөвлөлөөс мэдэгдэв.

Хүний эрхийн төлөө тэмцэгч Наргис Мохаммади одоогоор Ираны шоронд хоригдож байгаа бөгөөд тус улсын засгийн газраас түүнд 31 жилийн хорих ял, 154 удаа ташуурдуулах ял шийтгэл оноосон байна. "Наргис Мохаммади итгэл үнэмшлийнхээ төлөө өндөр үнэ төлж байна" гэж Норвегийн зөвлөлөөс гаргасан мэдэгдэлд дурджээ.

Мохаммади 1990-ээд онд их сургуулийн оюутан байхдаа анх хүний ​​эрхийг хамгаалах чиглэлээр ажиллаж эхэлсэн байна. Тэрбээр их сургуулиа төгсөөд инженерээр ажиллаж байхдаа Ираны зарим нэг хэвлэл мэдээллийн хэрэгсэлд хүний эрхийг хамгаалах сэдвээр нийтлэл бичдэг байв. 2003 оноос Ираны өөр нэг идэвхтэн, Нобелийн энх тайвны шагналт Ширин Эбадигийн үүсгэн байгуулсан Тегеран дахь Хүний эрхийн төвд ажиллаж эхэлнэ. 

2011 онд Наргиз Мохаммади анх баривчлагдаж, шоронд хоригдох ял шийтгэл авдаг. Хоёр жилийн дараа суллагдаж, тэмцлээ дахин эхлүүлж Иранд цаазаар авах ялын эсрэг жагсаал цуглаанд нэгдэнэ. 2015 онд тэрбээр эдгээр үйл ажиллагааныхаа төлөө дахин баривчлагджээ. Мохаммади Ираны шоронд хоригдож буй улс төрийн эмэгтэй хоригдлуудыг тамлан зовоож буй талаар болон бэлгийн хүчирхийллийн эсрэг байр сууриа илэрхийлсээр буй.

Эх сурвалж: ВВС