-Төрийн болон хуулийн байгууллага хүнд суртал, дарамт үзүүлсэн гомдлыг хүлээн авна-

УИХ-ын гишүүн Хууль зүй, дотоод хэргийн сайд С.Бямбацогт мэдээлэл хийлээ.

Тэрээр хөрөнгө оруулагчдыг төрийн захиргааны болон хуулийн байгууллагын дарамтаас хамгаалах, хөрөнгө оруулагчдад учирч буй хүндрэлтэй асуудалтай холбогдуулан мэдээлэл хийсэн юм.

Өнгөрсөн долоо хоногт Ерөнхий сайдын гаргасан захирамжийн дагуу хөрөнгө оруулагчид, аж ахуй эрхлэгчдэд хүнд суртал гарган, дарамт шахалт үзүүлж, үндэслэлгүйгээр мөрдөн шалгасан байдлыг нягтлахаар ажлын хэсэг байгуулсан. Холбогдох албаны төлөөллийг багтаасан тус ажлын хэсгийг ХЗДХ-ийн сайд С.Бямбацогт ахалж буй юм.

Төрийн болон хуулийн байгууллага хүнд суртал гаргаж, дарамт үзүүлсэн гомдлыг энэ сарын 15-ныг хүртэл авах болохыг ХЗДХ-ийн сайд хэллээ.

Тэрээр “2011 онд 4.7 тэрбум ам.доллар байсан. 2016 оны эхний зургаан сарын байдлаар 36 сая ам.доллар болсон байна. Сүүлийн дөрвөн жилийн дотор гаднын хөрөнгө оруулалт 130 дахин багассан байна. Энэ нь дан ганц төрийн албан хаагчдын хүнд сурталтай холбоотой биш байх. Олон учир шалтгаан байдаг ч энэ талыг шалгах хэрэгтэй. Төрийн бодлого тодорхой, тогтвортой байж гадна дотнын хөрөнгө оруулагчдыг татдаг. Хөрөнгө оруулагчдыг хүнд суртал, хууль бус дарамтаас хамгаалах бодлогыг энэ Засгийн газар баримтална. Татвар төлөгчид, баялаг бүтээгчдийг дэмжин, сүүтэй үнээгээ үхүүлчихгүй байх өөрөөр хэлбэл тэднийг дэмжих үүднээс энэ ажлын хэсгийг байгуулагдсан” гэсэн юм.

Мэдээллийн үеэр

Хөрөнгө оруулагчдын хандах хаяг: medeelel@moj.gov.mn
Хөрөнгө оруулагчдыг сонсох утас: (51)-263682-ыг зарлав.

Мөн гадаадын 200, дотоодын 5000 орчим иргэн гадагш зорчих эрхээ хасуулсан байна. Эдгээр иргэнийг ямар үндэслэлээр ийн эрхийг нь хассан гэдгийг тогтоох юм байна.