ШУА-ийн Археологийн хүрээлэн, АНУ-ын Йелийн их сургуулийн эрдэмтэд, уран бүтээлч Ё.Төгөлдөр, Г.Мөнхболор, Б.Бат-Эрдэнэ нарын хамтарсан “Бүтээлийн нуруу” хэмээн үзэсгэлэн нээлтээ хийлээ. Уран бүтээлчид 2017 онд Булган аймгийн Тэшиг суманд хийж буй археологийн судалгааны арга барил, үйл явцыг үзэж, судалсны үндсэн дээр олон сарын турш санаагаа боловсруулан бүтээлүүдээ туурвисан аж.

Үзэсгэлэнгийн танхимын гурван хананд уран бүтээлч тус бүрийн бүтээлийг  биетээр болон бичлэгийн хамт байрлуулсан байв. Бичлэгийн утга санаа нь бүтээлийн шинж чанар, байгальд оршиж буй дүр зургийг харуулсан дангаараа бие даасан бүтээл болж тавигджээ.

Уран бүтээлч Г.Мөнхболор “Сар, Хором”  /уран зураг, холимог техник/

Уран бүтээлч Г.Мөнхболор “Бүтээл гэдэг зүйл маань бүрэлдэж бий болохдоо өөрийн хэлбэр дүрсээ олсоор аажимдаа бүрэн бүтээл болж хувирдаг. Тэр утгаараа бүтээл бий болох тулгуур нь бүтээлийн нуруу юм. Бид цаг хугацааны өөрчлөлт, шилжилтийн явцад эртний эд зүйлс хэрхэн өөрчлөгдөж, хувирч байгааг судалсан. Тиймээс надад байсан хуучны зураг, эцэг өвгөдийнхөө хөргийг ашиглан санаагаа олж, бүтээлээ туурвисан” гэлээ.

Уран бүтээлч Б.Бат-Эрдэнэ “Хоосон”  /Өрөг даавуун утас, Видео/

Өрөг даавуун утсаар хийсэн энэхүү бүтээл нь хүний ахуй амьдрал, үйл, ул мөр байгальд хучигдан үгүй болж, ахин шинээр гарч ирж дахин алга болдог гэсэн санааг илэрхийлжээ.

Уран бүтээлч Ё.Төгөлдөр “200 жилийн настай Сибирийн нарсны шингэн хамгаалагч баримал” /Модны давирхай, яс, өвөлжийн өд/, “Тарвагатайн хөндийн шаталсан ажиглалт” /видео/

Эдгээр бүтээлдээ уран бүтээлч Ё.Төгөлдөр хөндийд цуглуулсан биет материалуудыг ашиглаж бичил шавьжны тогтоц, Уйгарын үед хамааруулан давирхайн баримал бүтээжээ. Мөн “Тарвагатайн хөндийн шаталсан ажиглалт” хэмээх видео нь барималаа гэрэлтүүлж, тодотгон харуулж байгаа нь маш сонирхолтой хослол болсон байв. 

Үзэсгэлэн 976 art gallery-д энэ сарыг дуустал үргэлжлэх юм.