МУЭ-ийн Нэрэмжит шагналт зураач, уран барималч, урлаг судлалын ухааны доктор С.Бадралын хоёр дахь бие даасан “Монгол ертөнц” үзэсгэлэн өнөөдөр нээлтээ хийх гэж байна.

С.Бадрал нь 1983 онд ДУДС, 1993 онд ОХУ-ын Санкт-Петербург хотын И.Е.Репиний нэрэмжит Урлагийн Академид нэрт уран барималч, профессор М.К.Аникушины урланд тус тус суралцаж төгсчээ.

Тэрбээр СУИС-ийн Дүрслэх урлагийн сургуулийн уран баримлын багшаар ажилладаг бөгөөд МУЭ-ийн Тэргүүлэгч гишүүн юм.

С.Бадрал нь 1994 онд анхны бие даасан үзэсгэлэнгээ Уран зургийн галерейд “Баянговь ”нэртэйгээр гаргаж эхэлснээс хойш гадаад дотоодод уран бүтээлээ байнга сурталчилах болсон байна.

Түүний энэхүү “Монгол ертөнц” үзэсгэлэн нь Монгол бэхэн зургийн орхигдсон уламжлалыг өөрийнхөөрөө сэргээн хөгжүүлж, уран баримлын хэлбэр форум, бодит болон хийсвэрлэл бүхий дүрслэлт зохиомжтой бүтээлүүдээрээ эртний түүх, эдүгээгийн амьдралын дүр зургийг дүрслэн харуулснаараа онцлогтой аж.

Үзэсгэлэнд 100 гаруй бэхэн зураг, 30 гаруй уран баримлын бүтээл дэлгэгдэх юм.

Тус үзэсгэлэнд тавигдах тэрхүү бүтээлүүд нь АНУ, Өмнөд Солонгос, Герман, Хятад, Франц, Нидерланд зэрэг 30 гаруй оронд дэлгэн тавигдаж олны хүртээл болж байсан юм байна.

“Монгол ертөнц” үзэсгэлэн МУЭ-ийн үзэсгэлэнгийн тахнхимд энэ сарын 25-ыг хүртэл үргэлжилнэ.