"Катар 2022" ДАШТ-ий H хэсгийн хоёр дахь тоглолт Португал болон Ганын шигшээ багийн хооронд болоход 3-2 харьцаагаар Португал хожлоо.

Тоглолтын эхний үед багууд маш хянамгай тоглож хамгаалж байсан ба хоёрдугаар үеийн эхэнд ч энэ тайван тоглолт үргэлжлэв. Харин 65 дахь минутад Криштиану Роналду торгуулийн цохилтоос гоол оруулсны дараа тоглолтын хэмнэл сэргэсэн.

Роналду торгуулийн цохилтоос гоол оруулснаар таван ДАШТ дараалан гоол оруулсан анхны хөл бөмбөгчин болов. Түүнийг гоолын баяраа тэмдэглээд удаагүй байхад Ганын шигшээ баг тооны харьцааг тэнцүүлсэн. Гоолыг ах дүү Айюгийн ах Андре оруулав.

Андре Айю гоол оруулсны дараа сэлгээнд суусан бөгөөд сэлгээний тоглогчидтой баяраа тэмдэглэж байх үеэр Португал дахин тэргүүлж эхэлсэн нь Жоаү Феликсийн гоол байлаа. Феликсийн гоолоос 2 минутын Рафаэл Леау гоол оруулж дасгалжуулагч Фернанду Сантошийн санааг амраав.

Гурван минутад хоёр гоол алдсан Ганачууд 89 дэх минутад тооны харьцааг ойртуулж Осман Букари гоол оруулсан ч оройтсон байлаа. Тоглолтын төгсгөлт тоог тэнцүүлэх боломж байсан ч Инаки Уильямс халтирч унаснаар Португал 3 оноо авлаа.