Дэлхийн таван тивийг бэлгэдсэн, олимпийн бэлгэ тэмдэг болсон таван цагиргийн нэг нь техникийн эвдрэлийн улмаас дутсаныг эс тооцвол 22 дахь удаагийн өвлийн олимпийн наадмын театрчилсан нээлт сүр жавхаатай боллоо. 

Арван таван өдрийн турш дэлхий нийт цастай, мөстэй, хурдтай, хүчтэй олимпийн уралдаан, тэмцээнүүдийг үзнэ. АНУ, ХБНГУ, Их Британи, Канад, Франц, БНХАУ болон Хойд Европийн орнуудаас хамгийн олон тамирчин иржээ. Тэгэхээр эдгээр улсуудын дунд өрсөлдөөн өрнөнө гэсэн үг. Зохион байгуулагч орныг ч мартаж болохгүй.

Цас, мөстэй ямар ч холбоогүй Виржинийн арлууд болон Ливан, Эквадор зэрэг улсуудын тамирчдад медаль хүртэх боломж бараг л үгүй гэнэ.

Өчигдөр Сочи хотын цэнгэлдэх хүрээлэнд 85 орны 2900 тамирчин нээлтэд оролцлоо. Эх орноо төлөөлсөн тамирчдын хувцас содон, сонин байлаа. Тэдний дийлэнхийх нь хувцас тухайн орны далбааг санагдуулам байсан юм.


Б.Чимгээ