Засгийн газрын өнөөдрийн ээлжит хуралдаанаар Гаалийн ерөнхий газрын даргыг томилжээ. 

Тодруулбал саяхан өөрийн хүсэлтээр Сонгуулийн ерөнхий хорооны даргын албан тушаалаа өгч байсан П.Дэлгэрнаран Гаалийн ерөнхий газрын даргын албанд очсон байна.

П.Дэлгэрнаран өмнө нь Үндэсний соёл, амралтын хүрээлэнгийн захирал, Нийслэлийн өмчийн харилцааны газрын дарга, Баянзүрх дүүргийн Засаг даргын орлогч, "Автобус-3" компанийн захирал, "Авто тээврийн үндэсний төв" төрийн өмчит үйлчилгээний газрын тэргүүн дэд захирлаар байгаад СЕХ-ны даргаар ажиллаж байжээ. 

Пүрвээгийн Дэлгэрнаран 1964 онд Улаанбаатар хотод төрсөн, эрх зүйч, улс төр судлаач мэргэжилтэй аж. 

Боловсрол: 
-1989 онд ЗХУ-ын Москва хотод Цэргийн дээд сургуулийг улс төрийн ажилтан мэргэжлээр төгссөн.
-1996 онд МУИС-ийн Хууль зүйн сургуулийг эрх зүйч мэргэжлээр тус тус төгссөн

Ажилласан байдал:
-1989-1990 онд Талх чихэр үйлдвэрийн хорооны дарга
-1990-1991 онд Улаанбаатар хотын Хөдөлмөрч залуучуудын эвлэлийн дэд дарга
-1991-1993 онд Улаанбаатар хотын Залуучуудын холбооны дарга
-1993-1995 онд Хүн ам, бодлого хөгжлийн яаманд ахлах түшмэл
-1995-1997 онд Монгол Улсын Улсын Их Хурал дахь МАХН-ын бүлэгт зөвлөх
-1997-1999 онд “Прогоноз” төвд эрдэм шинжилгээний ажилтан
-1999-2000 онд Үндэсний соёл, амралтын хүрээлэнгийн захирал
-2000-2003 онд Нийслэлийн өмчийн харилцааны газрын дарга
-2003-2005 онд Баянзүрх дүүргийн Засаг даргын орлогч
-2007-2012 онд “Автобус 3” компанийн захирал
-2012-2013 онд Автотээврийн газрын дарга
-2013-2020 онд “Автотээврийн үндэсний төв” төрийн өмчит үйлчилгээний газрын тэргүүн дэд захирал, захиралын зөвлөх
-2020 онд Улсын Их Хурлын Тамгын газрын Захиргаа, хүний нөөцийн хэлтсийн ахлах референт
-2020 оны 8-р сарын 29-нөөс Сонгуулийн Ерөнхий Хорооны даргаар томилогдон тус тус ажиллаж байжээ.