Ерөнхий сайд Г.Занданшатар хичээлийн шинэ жил, Эх хэлний өдрийг тохиолдуулан 9-р сарын 1-ний өдөр ерөнхий боловсролын сургуулийн 1-12-р анги тус бүрийн сурагчдад зориулж захидал илгээсэн.

Ерөнхий сайдаас сурагчдад хаяглан илгээсэн захидлын нэг бүрийг 1000 төгрөгөөр хэвлэсэн. Мөн орос хэл сураарай гэж бичсэн гэх мэт шүүмжлэл гарчээ. Иймд Ерөнхий сайд Г.Занданшатар өнөөдөр /2025.09.02/ 2026 оны улсын төсвийн төслийг танилцуулах үеэр тодруулга хийв.

Тэрбээр, Энэ бол зөвхөн Занданшатарын захидал биш. Засгийн газраас сурагчдад зориулж, анги бүрийн онцлогт тохируулан багш нартай зөвлөлдөж, сургалтын хөтөлбөртэй нь уялдуулан захидал бичсэн.

Жишээлбэл, Энэ жил 3-р ангиас англи хэлний хичээл шинээр үзэх гэж байна. Англи хэл сурах нь зөвхөн шинэ үг, дуу, шүлэг сурах төдий биш. Өдөр бүр хичээн сураарай, ингэснээр ирээдүйд өөртөө олон хаалгыг нээх болно. Энэ хаалгыг нээхийн тулд эх хэлээ сайн сурах хэрэгтэй.

Харин 6-р ангиас Орос хэл, Газар зүйн хичээлийг сонгон суралцаж эхэлдэг. Дэлхий ертөнцтэй илүү сайн танилцах, улс орны байгаль, цаг уурын онцлогийг сонирхон судлах орос хэл, газар зүйн хичээлийг шимтэн судална шүү гэж бичсэн. Гэтэл зөвхөн нэг хэлийг онцолсон мэтээр шүүмжилж байна.

Эрдэм сурахыг уриалсан ийм захидал хүүхдэд маш их урам өгдөг юм билээ. Би ч тойргийнхоо гишүүдэд захидал явуулж байсан. Нэг хүүхдэд 100 төгрөг зарцуулж, нийт хүүхдүүддээ урам өгсөн ажил юм шүү. Үүнийг Улсын төсвөөс гаргаагүй. Нийгмийн хариуцлагын хүрээнд хийсэн зүйл юм гэв.

Улсын хэмжээнд 2025-2026 оны хичээлийн жилд 895 ерөнхий боловсролын сургуульд 826860 сурагч суралцаж байна гэж Боловсролын сайд П.Наранбаяр хичээлийн шинэ жилийн баярын мэндчилгээндээ дурдсан билээ.