Улсын их дэлгүүр галд өртлөө. Улаанбаатар хотын нүүр царай болон өнгө нэмж өнөөг хүртэл унаган төрхөөрөө хадгалагдаж ирсэн, хотын иргэдийн дурсамжийг тээсэн дурсгалт барилгад сэв суулаа. Уншигчдадаа Улсын их дэлгүүрийн барилгын товч түүхийг хүргэж байна.   

Монгол Улсын нийслэлд улсын нүүр царай болох төв дэлгүүр анх 1924 онд байгуулагдаж, дарга, сургагч, ахлах нягтлан бодогч, дансны сургагч, тооцооны нягтлан бодогч, дансны дагалдан, барааны сурган боловсруулах мэргэжилтэн зэрэг 20-иод хүний орон тоотой ажиллаж байжээ.

Дараа нь 1933 онд шинэ байранд орсноор одоогийн Уран зургийн галерей Их дэлгүүр хэмээн нэрлэгдэх болж, хүнс болон өдөр тутмын барааны таван танхимд 40-өөд ажилтан ажиллаж байв.

Харин Ардын хувьсгалын 40 жилийн ойн баярын өмнө 1959 онд улсын хэмжээний худалдааны нэгдсэн төв барьж, байгуулах Монгол Улсын Засгийн газрын шийдвэр гарчээ. Монгол Улсын нүүр царай болсон Улсын их дэлгүүрийг 1959-1961 онд хятад ажилчид барьж, 1961 оны зургаадугаар сарын 28-ны өдөр өнөөгийн барилгыг ашиглалтад оруулан "УЛСЫН ИХ ДЭЛГҮҮР" хэмээн нэрлэсэн түүхтэй.

Төвлөрсөн төлөвлөгөөт эдийн засгаас зах зээлийн эдийн засагт шилжих 1990-ээд оны эхэн үед Улсын их дэлгүүр хувьчлагдсан ч өнөөг хүртэл улам өргөжин үндсэн үйл ажиллагаагаа явуулсаар ирсэн. Долоо давхар энэ барилгын нийт 23600 ам.метр талбайд үйл ажиллагаа явуулж, өдөрт дунджаар 15000- 20000 худалдан авагчдад үйлчилж байв. 

Улаанбаатар хотод өнгө нэмж, нийслэл хотын иргэдийн дурсамжийн нэг хэсэг болсон соёлын өв галд өртлөө. Галын шалтгааныг тогтоохоор мэргэжлийн хүмүүс ажиллаж байна.