Сэлэнгэ аймгийн Орхонтуул сумын Шар-Ус багийн “Цагаан тохой” гэдэг газар /аймгийн төвөөс баруун урд зүгт 214 км-т Улаанбаатараас Орхон аймгийн чиглэлд шатахуун тээвэрлэж явж байсан ачааны галт тэрэг замын хажуу руу унасан тухай дуудлагыг өчигдөр 21:45 цагт ОБЕГ хүлээн авсан.

Онцгойгийнхон Сайхан сум дахь Гал түймэр унтраах, аврах 61 дүгээр ангийн алба хаагчид 54 км зам туулан 02:38 цагт очиход борооны улмаас ул шороо угаагдаж, төмөр зам эвдэрсний улмаас Салхит өртөөнөөс Эрдэнэт чиглэлийн 78 дугаар км-т ачааны галт тэрэгний есөн вагон /7 вагон дизель түлш, 1 вагон элс, 1 вагон масло/ унаж, гурван вагоноос түлш асгарч байжээ. Улаанбаатар Төмөр замын зам, эрчим хүчний засварын ангийн 50 ажилтан, найман техник хэрэгсэлтэй ажиллаж буй аж.