Жаргалтай бас гайхалтайгаар шинэ жилийн баярыг тэмдэглэн өнгөрүүлэх уриалга дэвшүүлсэн Юнител группийн хамт олон сайн дураараа 330 бэлэг бэлдэж хөдөө орон нутгийн бага ангийн сурагчдад илгээлээ. “Юнителийн ах, эгч нараас нь инээмсэглэл дүүрэн ирээдүй үедээ илгээв” гэх мэндчилгээ бүхий 330 бэлэг Увс аймгийн Давст сум, Ховд аймгийн Дуут сум, Баян-Өлгий аймгийн Баян-нуур сумын бага ангийн сурагчдад хүрлээ.

Ажилтан бүрийн бүтээлч сэтгэлгээнээс хамааран өөр хоорондоо адилгүй 330 бэлэгт оюун ухааны тоглоомоос эхлээд, хичээлийн хэрэгсэл, соёл урлагийн эд зүйлс хүртэл багтаж байлаа. Тэгвэл Улаанбаатар хотоос урт замыг туулж, холоос зорьж ирсэн бэлгээ авсан жаалуудад ийм сэтгэгдэл төржээ:

“Ийм сайхан бэлэг өмнө нь би хэзээ ч авч байгаагүй. Та бүхэнд маш, бүр маш их баярлалаа” – 5 “а” ангийн сурагч Б.Ихэрцэцэг, Ховд аймаг

“Манай ангийн хүүхдүүд гоё хайрцагтай бэлгээ ахин дахин нээж харах гээд тэр өдөртөө хичээлдээ бүрэн анхаарч чадаагүй байхаа.” – 3-р ангийн сурагч Б.Төгөлдөр, Увс аймаг

“Бэлгийг задлахад дотор нь яг юу байгаа бол гэж миний сэтгэл маш их догдолж байсан. Тэгтэл миний хүсч мөрөөддөг бүх зүйл дотор нь байсанд чин сэтгэлээсээ баярласан!” - 5-р ангийн сурагч Ч. Хонгорзул, Ховд аймаг 

“Баяраар ихэвчлэн анги тус бүрээс нэг л хүүхэд бэлэг авдаг. Харин манай ангийнхан бүгдээрээ бэлэг авч байгаагаа мэдээд найзууд маань ч, би ч маш их баярласан!” 3-р ангийн сурагч Наурызгүл, Баян-Өлгий аймаг  

“Бидний авсан бэлэг бүр хоорондоо өөр байсан нь маш таалагдсан. Найзууд маань нэгнийхээ бэлгийг сонирхож, хоорондоо солилцож эхэлсэн” – 3-р ангийн сурагч Жансерик, Баян-Өлгий аймаг

“Авсан бэлэг дунд хамгийн таалагдсан нь өнгийн харандаа, бас дээрээс нь өнгийн цаас. Бэлэг бэлдэж надад өгсөнд баярлалаа” - 3 “а” ангийн сурагч Х.Солонго, Увс аймаг

Юнителчүүд 2021 оныг угтсан шинэ жилийн баяраар ч мөн өвөрмөц санаачлага дэвшүүлж байсан билээ. “Бэлгээ бэлэглэе” аянаар Юнител групп харилцагчдадаа илгээдэг бэлгийн нийт зардлаа хүүхдийн төлөөх гурван байгууллагад хандивлан болгож байв. Юнителийн хүүхэд төвтэй шинэ шинэ жил ийнхүү хоёрдахь жилдээ үргэлжилж байна.

“Жаргалтай гайхалтай” аяны талаар дэлгэрэнгүй: https://www.unitel.mn/unitel/news/620

Юнител групп 2020 оны шинэ жилийн баяраар “Бэлгээ бэлэглэе” аяныг санаачилж харилцагчдад илгээдэг бэлгийн нийт зардлаа нийгмийн хайр, халамжаар дутагдаж байдаг хүүхдийн төлөө 3 байгууллагад хандивлаж байсан билээ. Хүүхэд төвтэй шинэ жилийн баярын концепц маань хоёр дахь жилдээ Жаргалтай Гайхалтай сэдэв дор амжилттай зохион байгуулагдаж 330 бяцхан зүрхэнд баяр баясгалан, хүсэл тэмүүлэл бэлэглэж чадсан гэдэгт итгэлтэй байна.