#Шатар 2017 оны дэлхийн аварга, энэ жилийн дэлхийн аваргын горилогчоор шалгарсан, дэлхийн чансааны 2-рт жагсаж буй Тан Жунитэй тэнцэж оноо хуваалаа.

Олон Улсын шатрын холбоо буюу FIDE (International Chess Federation)-аас "FIDE Women's Grand Prix" цуврал тэмцээнийг жил бүр зохиодог.

Уг цувралын 2024-2025 оны улирлын гурав дахь тэмцээн, 80 мянган еврогийн шагналын сантай "FIDE Women's Grand Prix 2025 - Monaco" Монако улсын "Novotel Hotel Monte Carlo"-д үргэлжилж байна.

10 шилдэг шатарчин оролцож буй тэмцээний хоёр дахь өрөгт Монголын IM /Олон улсын мастер/ Батхуягийн Мөнгөнтуул Хятадын Тан Жунитэй тоглож тэнцлээ.

2017 оны дэлхийн аварга, дэлхийн чансааны 2-рт жагсаж буй Тан Жуни энэ жилийн дэлхийн аваргын горилогчоор шалгарсан бөгөөд дөрвөн удаагийн дэлхийн аварга Жу Венжунтэй дөрөвдүгээр сард тоглох билээ.

• eSport-ын томоохон багууд шатрын тоглогчтой болж эхэллээ

Тэмцээний эхний өрөгт 2008 оны дэлхийн аварга, 2021 оны рапид шатрын аварга Швейцарын Александра Костенюкийг ялаад байсан Б.Мөнгөнтуул ийнхүү 1.5 оноотой бусдыгаа хошуучилж байна.

Түүнтэй хамт Оросын Катерина Лагно, Энэтхэгийн Конеру Хумпи, Испанийн Сарасадат Хадемалшарие нар мөн 1.5 оноотой байна.

"FIDE Women's Grand Prix 2024-25" цувралын нийт зургаан тэмцээнээс цуглуулсан нийт оноогоор тэргүүлсэн хоёр тамирчин "Women's Candidates 2026" тэмцээнд оролцох эрхтэй болно. Өмнөх "Women's Candidates 2024" тэмцээнд Тан Жуни түрүүлснээр аваргаа хамгаалагч Жу Венжунтэй тоглох эрхтэй болсон юм.

Б.Мөнгөнтуул өмнөх "FIDE Women's Grand Prix 2024 - Shymkent" тэмцээнд 10-р байр эзлэн 15 оноо цуглуулсан амжилтайгаар нийт цувралын хүснэгтийн 16-д жагсаж байна.

Тэрээр өнөөдөр 22:00 цагаас гуравдугаар өрөгт Энэтхэгийн Конеру Хумпитэй тоглоно.