Улаанбаатарыг Хөшигийн хөндийтэй холбох төмөр замын шав тавих ёслол өнөөдөр болов. 102 км урт төмөр замыг ирэх аравдугаар сард ашиглалтад оруулна гэж Зам тээврийн хөгжлийн сайд Ж.Дэлгэрсайхан мэдээллээ.

Улаанбаатар хот, шинэ нисэх буудлыг түшиглэсэн Хүннү хотыг шинээр байгуулах эхлэл болж буйгаараа уг төсөл онцгой ач холбогдолтой гэв. Мөн орчин үеийн логистикийн 5PL стандартад нийцсэн ачаа, тээврийн үйлчилгээг нэвтрүүлж, Улаанбаатар хотын ачаа тээврийн үндсэн зангилааг Богд уулын урд хэсгээр тойруулдаг болно.  

Багахангай-Хөшигийн хөндий чиглэлийн төмөр замын төслийг нээлээ

Төмөр замын бүтээн байгуулалтыг “Эрчист Монгол” ХХК-ийн харьяа төрийн өмчит, уул уурхайн бус аж ахуйн нэгжүүдийн хөрөнгө оруулалтаар санхүүжүүлнэ.  

Төсөл хэрэгжсэнээр жилд өссөн дүнгээр 3.5-20 сая тонн ачааг Улаанбаатар руу оруулахгүй, шинээр баригдах “Тээвэр логистикийн төв” рүү тээвэрлэх юм байна.  

Багахангай–Хөшигийн хөндий чиглэлийн төмөр зам нь Улаанбаатар хотыг  тэлэх бодлоготой шууд уялдаатай, иргэд дагуул хотуудад шилжин суурьших, ажиллаж амьдрах, бизнес эрхлэх шинэ төв болгож хөгжүүлэхэд дэд бүтцийн гол хөшүүрэг болно гэв.

Гэрэл зургийг Г.Өнөболд