#CS2 The MongolZ "IEM Rio 2024" тэмцээний хоёр дахь тоглолтдоо Team Vitality-д 2-0 харьцаагаар хожигдож хасагдах шат руу уналаа. Тэд хасагдах шатанд Eternal Fire-тай тоглоно.

ESL (Electronic Sports League)-ээс зохиодог CS2 (Counter Strike 2)-ын хамгийн том тэмцээнүүдийн нэг "Intel Extreme Masters Rio 2024" үргэлжилж байна.

250 мянган ам.долларын шагналын сантай тэмцээнд Монголын "The MongolZ" дэлхийн шилдэг 16 багийн нэг болон өрсөлдөж байна.

Буянбатын "maaRaa" Эрдэнэдалайгаар удирдуулсан баг өнгөрсөн шөнө хэсгийн шатны хоёр дахь тоглолтоо Францын "Team Vitality"-тай хийж 2-0 (Inferno 17-19, Nuke 8-13) харьцаагаар хожигдлоо.

• The MongolZ анх удаа Virtus.pro-г хожлоо
• Өнөөдөр эхлэх "IEM Rio 2024" тэмцээнд The MongolZ оролцоно
• erkaSt Г.Эрдэнэцогт FlyQuest багийг дасгалжуулж ESL Challenger Atlanta-д түрүүллээ

Тоглолтод багийн ахлагч Бямбасүрэнгийн "bLitz" Гарьдмагнай 83.8 ADR (Average Damage Per Round)-тай багаа тэргүүлэв.

Монгол залуус өмнө Матью "ZywOo" Хербо тэргүүтэй Француудтай "ESL Pro League Season 19", "PGL CS2 Major Copenhagen 2024" тэмцээнүүдийн үеэр таарч 3 map тоглохдоо алинд нь ч хожиж байгаагүй юм.

The MongolZ өчигдөр эхний тоглолтоо Оросын "Virtus.pro" багийн эсрэг хийж Mirage 13-10 харьцаагаар хожсон юм. Ийнхүү тэд өнөөдөр хасагдах шатанд Туркийн "Eternal Fire"-тай 22:00 цагаас тоглохоор боллоо. Eternal Fire өнгөрсөн шөнө "G2 Esports"-ыг 2-0 харьцаагаар хожиж тэмцээнээс хассан байна.

Хоёр баг он гарснаас хойш хоорондоо дөрвөн тэмцээний хүрээнд 9 map тоглоход Туркийн баг 5-д нь хожоод байгаа юм. Тэд хамгийн сүүлд "ESL Pro League Season 20" тэмцээний playoffs-т таарахад 2-1 (Mirage 13-16, Anubis 13-9, Inferno 13-11) харьцаагаар Измайлкан "XANTARES" Дорткардегийн баг ялсан билээ.