УИХ-ын АН-ын бүлгийн дэд дарга, гишүүн Ч.Лодойсамбуу автомашины импорт, дугаар олголтын хязгаарлалтыг эсэргүүцэн байр сууриа илэрхийлээд буй. Тэрбээр өчигдөр хийсэн мэдэгдэлдээ бүлгийн хуралд Х.Нямбаатарыг урьсан ч түүнийг ирээгүйг нь шүүмжлээд "Манайд нэмж автомашин авахгүй, дугаар өгөхгүй байгаа нь авлигын нэг төрөл үүсгэх эрсдэл. Энэ бол шийдэл биш, харин залхуурал" хэмээн мөн ширүүхэн шүүмжлээд авсан.

Харин тэр хоёр сошиал орчинд нэг нэгэн рүүгээ хаягласан дараах тайлбаруудыг хийгээд байна.

УИХ-ын гишүүн Ч.Лодойсамбуу:
Хүн байхгүй бол асуудал байхгүй гэдэг шиг шинээр машин оруулахаа больчихвол түгжрэхгүй юм байна гэдэг тэнэг залуу, эсвэл авлига ашиг сонирхлын зөрчилтэй шийдвэр. Түгжрэлээс салчихсан том хот гэж байхгүй. Яаж багасгаж зохицуулсан бэ гэхээр жишээ нь,
1.Нийтийн тээврээ төрөлжүүлсэн
2.Нийтийн тээврээ хүртээмжтэй, тохь тухтай болгосон. Ядаж маршрутаа бие даагаад аятайхан зохио!
3.Боломжтой улиралд дугуй унах, алхах нөхцлийг бүрдүүлсэн. Хүн байтугай дөрвөн хөлтөн ч аятайхан алхах зам алга. Өөрсдөө нэмж эвдээд орхисноо зассан уу?
4.Хотын төвийг үнэгүй зогсоолгүй болгосон. Үнэтэй зогсоолд үнэгүй зогсвол торгуулийг маш өндөр байлга.
5.Торгуулиа төрөөс авах үйлчилгээтэй нь холбох замаар заавал авч шийтгэх тогтолцоотой.
6.Сургууль, цэцэрлэгийн үйлчилгээг иргэддээ ойртуул. Энэ түгжрэл машины тооноос биш хамгийн хүйтэн нийслэлийнхэн хүүхдээ сургууль цэцэрлэгт машинаар хол зөөдгөөс болж байна. Судла! хэмээн өөрийн цахим хуудас бичжээ.

Харин хариуд нь Хотын дарга Х.Нямбаатар:
Машин импортлохыг хориглосон, эсвэл өмчлөх эрхэнд халдсан, хязгаарласан ямар нэгэн хууль дүрэм, журам Монгол Улсад байхгүй. Шинээр машин худалдаж авах, өөрийн эзэмшлийн дугаарыг хадгалах, шилжүүлэх бүрэн боломжтой зохицуулалт хийсэн.

Бээжин, Шанхай, Сингапур гэх мэт томоохон хотууд тухайн хотод зорчих нийт авто машины квот тогтоодог болоод 30 жил болж байна. Улаанбаатар хот 80 мянган машины багтаамжтай байхаар анх төлөвлөгдсөн хэдий ч өнөөдөр 800 мянган машинтай болсон.

УИХ-ын гишүүн энэ сэдвээр олон нийтэд мушгин гуйвуулсан ташаа мэдээлэл тарааж, попорч байгаад харамсаж байна. Хуулиа унш хэмээн бичжээ.

Мөн л түүний хариуд УИХ-ын гишүүн Ч.Лодойсамбуу:
1. Танай Бээжин, Шанхай, Сингапур машины тоог хязгаарлахын өмнө нийтийн тээвэр, хувийн машин ашиглахгүйгээр хүн хүссэн цэгтээ тээргүй очих нөхцлийг хэрхэн бүрдүүлснийг харсан уу? Гудамжаар нь алхаж, нийтийн тээвэрт нь сууж үзсэн үү? Дуураймар аядаж байгаа бол дарааллыг нь зөв тооцож мэдэхгүй бол асууж байгаач очсон газраасаа.
2. Таны санаачилж өмнөх Их хурлаар батлуулсан, авлигыг тувт өөгшүүлэх “Нийслэл Улаанбаатар хотын замын түгжрэлийг бууруулах, гэр хорооллыг орон сууцжуулах тухай” хуулийн 9.1-д “Нийслэлийн тээврийн хэрэгслийн өсөлт, авто замын сүлжээний нягтрал, замын хөдөлгөөний түгжрэлийг харгалзан нийслэл хотод олгох ТЭЭВРИЙН ХЭРЭГСЛИЙН УЛСЫН БҮРТГЭЛИЙН ДУГААРТ ХЯЗГААРЛАЛТ ТОГТООНО” гэсэн нь шууд бусаар импортыг хориглосон, хүний оршин суугаа нутагтаа тээврийн хэрэгсэл өмчлөх эрхэд халдаж, хязгаарласан заалт, оролдлого биш үү? Биш бол энэ хязгаарлалт чинь түгжрэлд ямар ч сайн нөлөөгүй юм биш үү? Худлаа ярихаа боль! хэмээн ширүүхэн тайлбаруудыг харилцан хийгээд байна.

Сонирхуулахад өнөөдөр мөн автомашины бизнес эрхлэгчдийн төлөөлөл мэдээлэл хийсэн ба тэднийг "Хэдэн халтар төгрөг хураасан машины ченжүүд..." хэмээн доромжилсонд уучлалт гуйхыг Хотын дарга Х.Нямбаатараас шаардаж байв.

Тэдний дэлгэрэнгүй мэдээллийг дараах видеоноос хүлээн авна уу.