Өнөөдөр 12:00 цагт ОХУ-ын Ерөнхийлөгч В.В.Путин тусгай үүргийн онгоцоор  Чингис хаан ОУНБ-д газардана. Тэрээр шууд Чингисийн талбай руу хөдөлж, Ерөнхийлөгч Ц.Элбэгдоржийн хамт Их Эзэн Чингис хааны хөшөөнд хүндэтгэл үзүүлэх юм байна.

Дараа нь Төрийн ордны Баганат танхимд Ерөнхийлөгч В.В.Путин Хүндэт зочны дэвтэрт гарын үсэг  зурж, хоёр Ерөнхийлөгч дурсгалын гэрэл зураг авахуулах юм.

Хоёр Ерөнхийлөгчийн уулзалт Ёслол хүндэтгэлийн гэр өргөөнд болох бөгөөд албан ёсны хэлэлцээгээ “А” танхимд хийхээр болжээ.

Үүний дараа хоёр Ерөнхийлөгч Монгол-Оросын харилцаа, хамтын ажиллагааны баримт бичигт гарын үсэг зурах бөгөөд нийт 13 баримтад гарын үсэг зурах юм.

Төрийн тэргүүнүүд хэвлэлийн бага хурал хийсний дараа Халхын голын байлдааны ялалтын 75 жилийн ойг тохиолдуулан зоог барина. Өмнөх айлчлалынхаа үеэр Ерөнхийлөгч Путин Жуковын хөшөөнд цэцэг өргөж байсан. Энэ удаад ч хүндэтгэл  үзүүлэн, цэцэг өргөснөөр түүний айлчлал өндөрлөх юм байна.