GoGo.mn сайт, “Хоолзүйч” Фэйсбүүк хуудас хамтран мэргэжлийн хоолзүйчдийн зөвлөгөөг хүргэдэг боллоо. Энэхүү мэдээллээрээ эрүүл хооллох, хүнсний бүтээгдэхүүн зөв хадгалах,  өөрт тохирсон хүнсийг сонгож хэрэглэх зэрэг таны эрүүл мэндэд хэрэгтэй төрөл бүрийн мэдээлэл хүргэж байх юм. 

Өнөөдөр бид хүүхдийн дархлааг хэрхэн талаарх зөвлөгөөг хүргэж байна.

Хүүхдийн дархлааг дэмжих нь зөвхөн ханиад томууны улирал ойртоод ирсэн үед санадаг зүйл биш. Эцэг эхчүүд хүйтний улирал дөхөөд ирэхээр хүүхдийнхээ дархлааг яаж дэмжих вэ гэж их асуудаг. Ингэж ярих нь учир дутагдалтай юм.

Ханиад томууны улирал гэж нэрлээд байгаагийн учир нь биеийн дархлаатай шууд холбоотой. Дулааны улирлаас сэрүүний улирал руу  шилжих үед бид зузаан хувцсандаа ороогүй байдаг. Тэр үед бидний биед байгаа томуугийн вирус хүний биеийн температур буурч, даарч байгаа үед идэвхиждэг. Энэ үед хүний дархлаа унадаг гэдгийг эрдэмтэд судалжээ. Хүний биеийн температур 33 хэмээс доошоо ороход дархлаа унах нэг том нөхцөл болдог гэж үздэг байна.

Ковид 19-ийн халдвартай холбоотойгоор биеийн температураа бид байнга үзүүлж байна. Гаднаас даараад ороод ирсэн үед зарим хүний биеийн температур багассан байдаг. Гаднаас орж ирж байгаа болохоор зөвхөн гарны температур үзэх нь учир дутагдалтай хэдий ч хүний биеийн температур тэгтлээ буурдаг гэдгийг бид харж байна. Ингэж биеийн температур доошоо орж байгаа үед бидний дархлаа унаж байгаатай холбоотойгоор өвчин үүсгэх гээд хүлээж байгаа бактер вирусууд тэр дороо үржиж ханиад томуу болчихоод байгаа ажээ.

Хүүхдээ ханиад томуу тусгахгүй байлгах нь бүтэн жилийн үйл ажиллагаа байдаг юм. Тэр тусмаа зуны улирлыг үр дүнтэй ашиглах нь маш чухал. Зун хүүхдүүдээ аль болох чийрэгжүүлэх ёстой. Чийрэгжүүлснээр дархлааг нь бат бөх байлгах буюу дархлааны эсүүдийг хүчтэй байлгаж болох нь.

Зуны улиралд хүүхдээ наранд арьсыг нь ил гаргаж, гүйлгэж, эрүүл агаарт байлгах нь нэгдүгээрт орох чухал зүйл.

Хоёрдугаарт, бүтэн жилийн туршид ханиад томууны улирал эхэлж байгаагаас үл хамааран хүүхдэдээ шим тэжээллэг тэнцвэртэй хоолыг өгөх хэрэгтэй.

• Хүүхдүүдийнхээ хооллолтыг сайн байлгавал ханиад томуу тусах нь эрс бага байдаг. Ханиад томуу туссан ч хүндрэл нь бага байна.
• Мөн хүүхдийнхээ өглөөний цайг сайн уулгадаг байх хэрэгтэй.
• Оройн хоолыг хэт оройтуулж идүүлдэггүй байх нь чухал.
• Хүүхдэдээ цагаан идээ, бифидум бактеритай тараг өгч байх хэрэгтэй. Дархлаанд гэдэсний ашигтай бактер их нөлөөтэй байдаг. Тийм учраас пробиотиктой бүтээгдэхүүн буюу тараг сайн уулгаж байгаарай.
• Аарц, хоормог гэх мэт исэг цагаан идээнүүдийг сайн хэрэглүүлж байх, өдөр бүр хүүхдийн наснаас хамаараад 2-4 аяга сүү, цагаан идээ хэрэглэх ёстой байдаг. Тэгэхээр үүнтэй тэнцэх хэмжээний дор хаяж 2 аяга тараг уулгаж байвал сайн.
• Мөн чихрийн хэрэглээгээ бууруулах хэрэгтэй. 
• Хүүхдээ яг цагт нь унтуулж байх нь чухал. Ер нь бага насны хүүхэд 21-22 цагт, хамгийн оройтлоо гэхэд 23 цагт унтдаг байх ёстой.

Дээрх зүйлүүдийг анхаарч чадах юм бол хүүхдийн дархлаа сайн байна. Дархлаа сайтай хүүхэд өвчин бага тусна гэсэн үг.

Фэйсбүүк хуудас : Хоолзүйч

Инстаграм хуудас : Хоолзүйч

Youtube  сувгийн холбоос :  Хоолзүйч