Хөдөлмөрийн үндэсний намаас парк шинэчлэлийн хүрээнд автобус худалдан авах үйл ажиллагааны асуудлаар өнөөдөр мэдээлэл хийлээ.

Хөдөлмөрийн үндэсний намын Баянзүрх дүүргийн намын хорооны дарга А.Отгонбаяр "Ногоон автобус шинэ эсвэл хуучин гэдгийг өчигдөр үзсэн нөхцөл байдлаас тайлбарлая. Арлын дугаарыг шалгахад 1993 онд үйлдвэрлэсэн машин байна гэдэг мэдээллүүд гарч ирсэн. Мэргэжлийн хүмүүс сайтаас шалгасан. Машины арлын дугаар хүний хурууны хээтэй адил, дахин давтагддаггүй зүйл.

Автобусны урд хаалганы хэсэгт гэрэл тусгаад харвал зэвтэй, арын тээшний зүүн хэсэгт будаг, замаск хийгдсэн, автобусны доод хэсэгт олон нүхэлсэн, эрэг боолт нь дутуу, дунд хаалганы хэсэгт будаг хийсэн цаасан скочтой байсан. Урд хаалганы доод нугасны хэсэгт ногоон будаг хийсэн байсан. Эндээс харахад уг автобусыг үйлдвэрлэлийн аргаар бус гар аргаар угсарсан байдал харагдсан.

Машин, техник үйлдвэрлэлд эхлээд бүх деталиудаа захиалаад мм-ийн алдаагүйгээр зураг төсөл гардаг. Үүний дараа будаг хийж, эд ангиудаа суурилуулдаг. Гэвч эдгээр автобуст гэрэл, дохио зэргийг суурилуулсны дараа нэмж будаг хийхдээ маш бохир хийсэн байгаа юм" гэв.