Зарим төрлийн вакцин хүүхэд аутизмтай болоход нөлөөлдөг гэх мэдээлэл цахим орчинд тархаж, энэ нь хүүхдийг олон төрлийн халдварт өвчнөөс хамгаалах дархлаажуулалтыг эрчимжүүлэхэд сөргөөр нөлөөлсөөр байна.

Хүүхдийг эхийн сүүгээр хооллох дэлхийн 7 хоногийг 8-р сарын сарын эхний долоо хоног буюу 4-11-нд дэлхийн 170 гаруй орон тэмдэглэж байгаагийн нэг нь Монгол Улс. Хүүхдээ хөхөөр хооллохыг уриалж, 8-р сарын 4-ний даваа гарагт ЭМЯ-наас мэдээлэл хийсэн юм. Энэ үеэр хүүхдийн эмч Т.Навчаа эхийн сүүний ач холбогдол болон вакцины ач холбогдлын талаар дараах мэдээллийг өгсөн юм. 



Хүүхдийн эмч Т.Навчаа, Эхийн сүү бусад сүүн тэжээлээс хэд хэдэн онцлог давуу талтай. Юуны өмнө, хүүхдийн дархлаа тогтолцооны хөгжлийг хангадаг. Эхийн сүүнд дархлааны уургууд агуулагддаг. Үүн дотроо иммуноглобулин А маш өндөр тунгаар агуулагддаг. Энэ нь эхийн сүүгээр дамжин хүүхдийн хоол боловсруулах тогтолцоог тэр чигт нь бүрхэж байдаг. Тиймээс өвчин үүсгэгч нянгууд хоол боловсруулах замыг гэмтээж чадахгүй гэсэн үг.

Мөн бусад олон өвчний эсрэг дархлаа тогтоно. Эх ямар өвчинд өртсөн, тэрний эсрэг үүссэн дархлаа эхийн сүүгээр дамжин хүүхдийг сэргийлнэ. Эдгээр иммуноглобулинуудаас гадна үйлдвэрийн сүүн тэжээлд байдаггүй биологийн идэвхт бодис эхийн сүүнд агуулагддаг тул нян вирус үржиж, хуваагдахыг дарангуйлдаг. Пребиотикуудыг агуулдаг тул гэдэс ходоод дахь ашигтай нянгуудын өсөлт хөгжлийг дэмждэг.

Эдгээр нь хүүхдийг уушгины хатгалгаа, чихний халдвар, туулгалт, томуу, улаанбурхны халдвараас сэргийлнэ. Гэвч томуу, улаанбурхны хувьд вакциныг орлох бүтээгдэхүүн одоогоор хүн төрөлхтөнд байхгүй тул вакцинаа хийлгээрэй. Сар хүрэхгүй хугацааны дараа сургууль, цэцэрлэг орно. Хүйтэн сэрүүн болж, хаалга цонхоо хаана. Битүү орчинд олуулаа цугларах үед улаанбурхан тархах таатай нөхцөл бүрдэнэ.

1970-аад  оноос хойш 40 гаруй жил хийсэн судалгааны үр дүнг 2025 оны эхээр танилцуулсан. Вакцин хүүхдийн эрүүл мэнд, өсөлт хөгжилд ямар ч хор нөлөөгүй, жишээлбэл аутизмтай ямар ч холбоогүй гэдгийг олон жилийн судалгааны үр дүнд нотолсон.

Хөхний сүү хүүхдийн оюуны хөгжилд маш сайнаар нөлөөлдөг. IQ нь дунджаас дээш хүмүүсийн 39 хувь нь хөхөөр хооллож өссөн хүүхэд байдаг гэсэн судалгаа бий. Тэгэхээр IQ өндөртэй хүүхэдтэй болмоор байвал хоёр нас хүртэл нь хөхөөр хооллохыг уриалмаар байна гэв.