ССАЖЗ-ын сайд Ч.Ундрам Төрийн ордонд сэтгүүлчдийн асуултад хариулав.

Сэтгүүлчид түүнээс өсвөрийн тамирчдад зардал мөнгийг нь шийдэж өгөөгүйгээс зочид буудлын үүдэнд хоноглосон, эсэхийг тодрууллаа. Учир нь "Бахрейн-2025" Азийн залуучуудын наадамд Монголоо төлөөлсөн өсвөрийн тамирчдад тэмцээний зардлыг шийдэж өгөөгүй. Тамирчид зочид буудлын үүдний хэсэгт, хаа таарсан газраа хоног төөрүүлж байна гэж багийн дасгалжуулагч, МУГТ Г.Отгонцэцэг мэдээлжээ.

ССАЖЗ-ын сайд Ч.Ундрам "Олимпын үндэсний хороо энэ асуудлаар мэдэгдэл гаргасан байна лээ. Тухайн тамирчдын холбоод өөрсдөө зочид буудлаа захиалдаг. Нислэг нь үүрээр буугаад, буудалд орох цаг нь болохоор буудалдаа орох гээд хүлээж байсан юм билээ. Дэлхий нийтийн жишгээр үдээс хойш 14.00 цагт зочид буудлууд зочдоо оруулдаг. Гэхдээ тухайн холбоо нь зочид буудалтайгаа ярилцаад 06.00 цагаас оруулахаар болсон.

Тэр хооронд тамирчид амарч байсан үеийн зургийг олон нийтийн сүлжээнд тавьжээ. Олимпын хорооноос тухайн тамирчдад тодорхой хэмжээний санхүүжилт олгосон юм билээ. Яамнаас нийт 26 төрлийн, тив дэлхийн уралдаанд холбоодтой нь гэрээ байгуулаад санхүүжилт олгодог.

Эдгээрийн дунд жүдогийн холбоо бий. Энэ онд тус холбоонд 700 орчим сая төгрөгийн санхүүжилт өгсөн. Бид боломжоороо Биеийн тамир спортын хороо буюу Спортын төв ордонд бэлтгэл хийх боломжоор хангадаг. Холбоод тухайн мөнгөө гэрээнд заасны дагуу тамирчдаа тэмцээнд явуулах уу, бэлтгэлд нь зарцуулах, дасгалжуулагчийн цалинд өгөх үү гэдгээ шийддэг. 

-Та Монгол Улсын гавьяат тамирчин Отгонцэцэгтэй уулзсан уу?
-Үгүй. Тухайн хүн надад хандаад албан ёсоор уулзах хүсэлт тавиагүй. Шууд олон нийтийн хэвлэл мэдээллийн хэрэгслээр сэтгэгдлээ илэрхийлсэн юм байна гэж би ойлгосон. Ер нь тамирчдад дэмжлэг маш их хэрэгтэй байна. УИХ олонхоороо шийдвэр гаргаж, төсөв баталдаг. Өнгөрсөн зун төсөв тодотгосон. Хамгийн их хасуулсан салбаруудын нэг нь спорт. Ганцхан надаас биш, шийдвэр гаргадаг, УИХ-ын гишүүдээс асуух хэрэгтэй.          

“Physical Asia” шоунд оролцож буй баг тамирчдын хувцсыг манай яамнаас санхүүжүүлээгүй гэв.