Эрүүл мэндийн яамнаас "COVID-19" халдварын мэдээлэл хийж байна. 

ЭМЯ-ны Шуурхай удирдлагын газрын дарга Д.Нарангэрэл, Өнөөдрийн байдлаар коронавирусийн халдвар нийт 213 улсад тархаж өвчилсөн хүний тоо 2.6 саяд хүрсэн. Мөн нас барсан хүний тохиодол 177,619 харин бүрэн эдгэрсэн хүний тоо 690 мянгад хүрлээ. Сүүлийн 24 цагийн дотор тархалт шинээр бүртгэгдсэн улс орон байхгүй. Монгол Улсын хэмжээнд ажиглалтад нийт 5193 хүн байгаа нь нэгдүгээр сараас хойшхи тоо. Харин яг одоо ажиглалтын байранд 1222 хүн бий. Мөн өнөөдрийн байдлаар нийт 514 хүн гэрийн ажиглалтад байна. 

ЭМЯ-ны Эмнэлгийн тусламжийн газрын дарга Я.Буянжаргал, ДЭМБ-аас Африкийн улсуудад коронавирусийн халдвар эрчимтэй тархах эрсдэл маш өндөр байгааг анхаарууллаа. Вакцинтай холбоотой шинэ мэдээлэл гарсан нь Германы эрдэмтэд коронавирусийн эсрэг вакциныг хүний биед турших зөвшөөрлийг авсан бөгөөд эхний ээлжинд 18-55 насны хүмүүсийг вакцины туршилтад хамруулахаар болжээ.  Хамгийн өндөр өвчлөлтэй байгаа нь Америк, Испани, Итали, Герман, Франц, Турк улсууд юм. ОХУ-д өчигдрийн байдлаар нийт 5200 хүн коронавирусийн халдвар авсан мөн 67 хүн нас барсан. Халдвар авсан хүмүүсийн ихэнх нь Москва хотод байгаа бөгөөд хүүхдүүд мөн халдвар ихээр авчээ. БНХАУ-ын эрдэмтэд коронавирусийн халдварын өвчнийг үүсгэгч SARS-2-т судалгаа хийж, 30 омог байна хэмээн үзсэн байна. Мөн хамгийн их нас баралтыг үүсгэдэг омог нь Европ, АНУ-ын Нью-Йорк хотод тархсан байгаа аж. ДЭМБ-аас халдварын тархалт удаан үргэлжлэх төлөвтэй байгааг анхааруулжээ. Вакцин үр дүнтэй эм гартал олон нийтийн газар зай барих зэрэг нь бидний амьдралын нэгэн хэвийн үзэгдэл болно. Иймээс маш олон компаниуд шинэчлэл хийх шаардлагатай болж байгааг ДЭМБ-аас онцолжээ.

ХӨСҮТ-ийн ерөнхий захирал Д.Нямхүү, өчигдөр ХӨСҮТ-д болон орон нутагт сэжигтэй тохиолдол илрээгүй. Сэлэнгэ, Дархан-Уул аймагт тусгаарлагдсан 26 хүнээс шинэ коронавирус илрээгүй. ХӨСҮТ-д 159 хүн хянагдаж байна. Алтанбулаг боомтоор орж ирж байгаа жолооч нарыг хянах зорилгоор Дархан-Уул аймгийн лабораторийг ажиллуулж, ХӨСҮТ-ээс нарийн мэргэжлийн хүн очиж ажиллаж байна. Ховд, Дорнод зэрэг аймгуудад мөн лаборатори бэлтгэгдсэн. 35 дахь тохиолдол буюу олон улсын тээврийн жолооч хүүтэйгээ уулзсан гэх мэдээлэл тархсан бөгөөд үүнийг няцааж байна. Тэрбээр хүүтэйгээ уулзаагүй зөвхөн утсаар ярьсан болох нь тогтоогдсон. Одоогийн байдлаар ХӨСҮТ-д хэвтэн эмчлүүлж байгаа хүмүүсийн биеийн байдал тогтвортой сайн байгаа бөгөөд хамгийн гол нь сэтгэлзүйн эмчилгээ гэдгийг бидний олон туршилтаар харуулж байна. Эдгээр хүмүүст эм эмнэлзүйн эмчилгээ хийхээс гадна сэтгэлзүйн дэмжлэг үзүүлэх зөвлөгөө өгөх маш том баг ажиллаж байна.