-Дэлхийн уул уурхайн хоёр дахь том хурал Саудын Арабын нийслэл Рияд хотод үргэлжилж байна-

Ирээдүйн эрдэс баялгийн хурал 2025 хоёр дахь өдрөө үргэлжилж байна. Хурлын эхэнд танхимд байрлуулсан том дэлгэц дээр бүхнийг бүтээсэн, агуу Аллах бурханд талархаж, залбирсны дараа төрийн дуулла эгшиглүүлж, хурал эхлэв.

Хурлын нээлтийн илтгэлийг Саудын Арабын хаант улcын Аж үйлдвэр, эрдэс баялгийн сайд Бандар бин Ибрахим ал-Хораф тавилаа. Саудын Араб нь газрын тос, байгалийн хийн баялаг нөөцтэй, Булангийн орнуудын нэг бөгөөд бүс нутагтаа улс төр, эдийн засгийн том тоглогч, 34 сая хүн амтай.

Газрын тос, байгалийн хийнээс өөр эс үүсвэрээс эрчим хүч үйлдвэрлэх төслүүдийг төрөөс дэмждэг байна. Засгийн газар одоогоор зургаан ААН-д урамшуулал олгожээ. Үүнд санхүүгийн болон санхүүгийн бус урамшуулал багтдаг. Жилийн 2.5-4 хувийн хүүтэй зээл өгч, ажилчдын цалингийн тодорхой хувийг төрөөс хариуцах гэх мэт боломжийг компаниудад олгодог аж. Нийт санхүүжилтийн 70 хүртэл хувийг зээлээр санхүүжүүлнэ.

Энэ нь байгалийн хий, газрын тосноос хэт хамаарлаа бууруулах, хүлэмжийн хийг бууруулах, ногоон эрчим хүч рүү шилжих, газрын тос, байгалийн хийнээс өөр салбарт үйл ажиллагаа явуулдаг компаниудынхаа өрсөлдөх чадварыг дээшлүүлэх зорилготой холбоотой.

Тус улс 2030 он хүртэлх хөгжлийн төлөвлөгөөгөө баталсан бөгөөд уул уурхайн Цахиурын хөндий болох зорилгоор Ирээдүйн эрдэс баялгийн хурлыг дөрөв дэх жилдээ зохион байгуулж байна. Анх 3500 оролцогчтой эхэлсэн энэ хуралд уул уурхай, банк санхүү, тээвэр, технологийн салбарын 20 мянга орчим хүн оролцож байна.

Тэд эрдэс баялгийн нийлүүлэлтийг тогтворжуулах зорилгоор уул уурхайн салбарт гарсан шинэ мэдээллийг хуваалцах, харилцан туршлага судлах, бизнесээ өргөтгөх зорилгоор ирдэг аж.

Таамаг нөөцөө 2.5 их наяд ам.доллар гэв. Саудын Арабын хаант улс уул уурхайн салбараа илүү хөгжүүлэх, эрдэс баялгаа төрөлжүүлэхийн тулд эрэл хайгуулыг эрчимтэй дэмждэг. Угсаа залгамжлах хаан манлайлал үзүүлдэг бөгөөд энэ хурлыг түүний санаачилгаар зохион байгуулжээ.