Яг одоо Сүхбаатарын талбайд утааны эсрэг дорвитой арга хэмжээг нэн яаралтай авахыг төр засагт сануулах ээж, аавуудын жагсаал эхэлж байна.

“Утааны эсрэг ээжүүд” холбооноос уг жагсаалыг санаачилсан бөгөөд долоо хоногийн өмнө жагсаалын талаарх мэдээллийг нийгмийн сүлжээнд байршуулсан. Ингээд маш олон хүний дэмжлэгийг авч өнөөдөр Засгийн газарт шаардлага хүргүүлэхээр болоод байгаа билээ.

Төр Улаанбаатар хотын иргэдийн эрүүл, аюулгүй байдлыг хангаж ажиллаж чадахгүй байна. Тиймээс тэд иргэдийн дуу хоолой болж дараах шаардлагыг тавьж байгаа юм. Үүнд:

• Эмнэлгийн орны хүрэлцээг нэмэхэд яаралтай арга хэмжээ авах шаардлагатай
• Утаа гамшиг болсныг хүлээн зөвшөөрөх зөвлөмж мэдэгдэл гаргах
• Утааны голомтод очиж нөхцөл байдал дээр Засгийн газар хуралдах
• Утаа бууруулж чадаагүйгээ тайлбарлаж тайлангаа тавих
• Яаралтай цогц арга хэмжээ авах ажлын хэсгийг яаралтай гаргаж мэдэгдэх
• Агаарын бохирдлоос үүдэлтэй гэдэг нь батлагдсан хатгалгаа болон бусад өвчлөл эндэгдэл дээр нөхөн олговор олгох
• Засгийн газар нэгдүгээр сарын 10 гэхэд агаарын бохирдлыг хэдэн хувиар бууруулахаа мэдэгдэх
• Засгийн газрын утааг бууруулах Үндэсний зөвлөлийн ажлыг хянах иргэний нийгмийн төлөөллийг оролцуулах
• Энэ Засгийн газар бүрэн эрхийнхээ хугацаанд утааг 80 хувь бууруулах төлөвлөгөөгөө нэгдүгээр сарын 26-нд танилцуулах зэрэг болно.

Жагсаалыг санаачлагч, Ц.Пүрэвхүү өөрийн сэтгэгдлээ илэрхийлж байна. Тэрбээр намраас хойш хүүхдийнхээ ханиадыг эдгээж вакцин тариулахыг хичээсэн боловч вакцин тариулах боломж олдохгүй байгааг хэлж байна. Энэ жил гэхэд л гурван удаа ч эмнэлэгт сахисан тухайгаа ярьж байна.

Утааны асуудал хөндөгдөөд 15 жил болоход өдийг хүртэл ямар ч арга хэмжээ аваагүй учраас өнөөдөр ийм байдал байгаа учраас утааны эсрэг ээж, аавууд жагсаж байгаа талаараа хэлж байв.

Аравдугаар сараас хойш утааны асуудал хөндөгдөж, 15 жил хүнд хэцүү нөхцөл байдалд байхад Монгол Улсын Ерөнхий сайд арванхоёрдугаар сар гарсны дараа утааны эсрэг ажиллах үүрэг өгч байна. Харин хотын дарга нь жагсаалын сургаар ажил хийсэн харагдах гэж хичээж байна гэдгийг тэрбээр хэлэв. Яг л энэ мэт хувиа хичээсэн улстөрчид 15 жилийг ардаа үлдээсэн учраас өнөөдөр ээжүүд бяцхан үрсээ энгэртээ тэвэрч чадахгүй алдаж, хүүхдээ тэврээд шалаар хэвтэж байна гэдгийг хэлэв.

Шинэ Засгийн газар энэ дөрвөн жилийн хугацаанд Утаанбаатарыг Улаанбаатар болгохыг шаардав. Учир нь агаарын бохирдол дараах байдлаар хүний эрүүл мэндэд сөргөөр нөлөөлдөг.

900 ГАРЫН ҮСЭГ ХЭРЭГТЭЙ

Жагсаал зохион байгуулагчид УИХ-ын Өргөдлийн байнгын хороонд өргөдөл өгөхөөр гарын үсэг цуглуулж байна. Жагсаалд оролцогчид талбайн хоёр талд байрлах өргөдлөөс бөглөх боломжтой юм байна.

УЛСЫН ЭМНЭЛГИЙН ТӨЛБӨРТЭЙ ӨРӨӨГ ЭСЭРГҮҮЦЭВ

Улаанбаатар хотын хүн ам 500 мянга байхад зориулж барьсан эмнэлгээр өнөөдөр 1.6 сая хүнд үйлчилж байна. Тиймээс ч хүйтний улиралд хүүхдүүд шалан дээр хэвтэж байна. Улсын эмнэлэгт төлбөртэй өрөө байгааг тэд эсэргүүцэж байна. Төлбөр төлөөд хоёулаа нэг өрөөнд харин даатгалаар бол арвуулаа нэг өрөөнд байгааг тэд хэлэв.

Хүүхдийн нэг эмч өдөртөө 25 хүүхэд үзэх байтал өнөөдөр 50 хүүхэд үзээд ч цаана нь үзүүлж чадахгүй үлдэж байгааг иргэн Март хэлж байна. Тиймээс ч 2017 он гэхэд хүүхдийн эмнэлэг шинээр барих хэрэгтэй гэдгийг хэлж байгаа юм.

Аав ээжүүдийн төлөөлөл болох Алтангэрэл "Утааны асуудал бидний үр хүүхдийн ирээдүйг залгиж байна. Би хоёр ихэр хүүхэдтэй. Тэд маань аутизмтай. Агаарын бохирдол, байгаль орчны нөхцлөөс болж ийм өвчтэй болдог. Баянхошуунд агаарын бохирдол их байна гэдэг. Гэтэл Зайсанд ч ялгаагүй хэвийн хэмжээнээс хэд дахин их байна. Бид бүгд нэг завин дээр байна. Бид бүгд нэг агаараар амьсгалж байна. Би 30-тай. Амьдралынхаа талыг утаанд утуулчихлаа. Эрүүл мэнд маань ч тэр хэрээр буурч байна. Тал болж талцахгүй, хавар болоход мартахгүйгээр бид нэг зүгт харж агаарын бохирдолтой тэмцэх хэрэгтэй" гэдгийг тэрбээр хэлэв.

АМНЫ ХААЛТ, АГААР ШҮҮГЧ АРД ИРГЭДИЙГ АВРАХГҮЙ

16 настай охины ээж чин сэтгэлийн үгээ хэлж байна. Зургаан жилийн өмнө инээдээр цалгиж явсан охин нь цусны өвчнөө өвчилсөн. Зургаан жилийн өмнө охины өвчний онош тогтоож байх үед энэ өвчтэй гэж бүртгэгдсэн хоёр дахь тохиолдол болжээ. Харин өнөөдөр энэ өвчнөөр гурван настайгаас эхлээд олон хүүхэд өвчиндөө шаналж байна. Өвчний шалтгааныг баттай тогтоосон зүйл байхгүй ч хамгийн өндөр магадлалтай нь агаарын бохирдол, баталгаат бус хүнс гэдгийг эрдэмтэд таамаглаж байна.

Ерөнхийлөгч, Ерөнхий сайд өрийн өндөрлөгүүд ээ, амны хаалт, агаар шүүгч ард иргэдийг чинь аврахгүй нөхцөлд байна. Төрийн хэрэг чухал ч монгол үндэсний аюулгүй байдал түүнээс чинь илүү чухал. Цэлмэг тэнгэр, цэнгэг агаарыг зүүдэлж л чаддаг ирээдүйтэй болох цаг ойрхон байна гэдгийг тэр хэлэв.

Ээж, аавуудын шаардлага дунд агаарын бохирдлыг ойрын хугацаанд яаралтай багасгах заалт багтжээ. Мөн ойрын хугацаанд агаарын бохирдлыг 80 хувиар бууруулахыг ч шаардаж байна. Харин Улаанбаатар хотын агаарын бохирдлын үүсгэгчид нь:

ТӨР ЗАСАГ АРД ТҮМНЭЭСЭЭ ДЭНДҮҮ ХОЛ БАЙНА

75 настай иргэн жагсаалын үеэр үгээ хэлж байна. Тэрбээр жагсаалд оролцож байгаа төр засгийн удирдлагын хүн байвал халзан цагаан хониор шагная гэсэн ч ганц хүн алга хэмээв. Ингэж хэлэх учир нь төр засаг ард иргэдээсээ ийм хол байгааг сануулав. 13 ач, зээтэй энэ иргэн дулаан хадгалах тал дээр анхаарах ёстойг хэлсэн юм.

ОНЦ БАЙДАЛ ЗАРЛАЖ БАЙХЫГ ШААРДАВ

Үр хүүхдээ эрүүл өгсөхийн тулд хөдөө амьдарч байгаад жагсаалд оролцохоор ирсэн иргэн үгээ хэлж байна. Тэрбээр багш, судлаач, эмч мэргэжилтэй бөгөөд хүүхдүүдийнхээ төлөө хөдөө амьдарч байгаа аж.

2000 оноос хойш маш олон эрдэмтэн, судлаачид судалгаа шинжилгээний ажлыг хийсэн ч үе үеийн төр захиргаа үүнээс ганцыг нь ч ашиглаагүй гэдгийг хэлэв.

Засгийн газар агаарын бохирдол гамшгийн хэмжээнд хүрснийг хүлээн зөвшөөрч, шаардлагатай үед онц байдал зарлаж байхыг шаардав.
 

ҮР ДҮНД ХҮРТЭЛ БИД ЗОГСОХГҮЙ

Монгол Улсын Ерөнхийлөгч болон төр засгийн удирдлагуудаас шаардлагын хариуг заасан хугацаанд өгөхийг жагсагчид шаардлаа.

Жагсаалын үеэр сайхан сэтгэлт хүмүүс, аж ахуйн нэгжүүд жагсагчдад халуун аарц, цайгаар дэмжлэг үзүүлж байгаа юм.

Take off хамтлагийн дуучин Сүхээ яг одоо үг хэлж байна. Тэрбээр өнөөдрийн жагсаалыг 100, 200 хүн биш 1000, 2000-аараа дуу хоолойгоо нэгтгэх шаардлагатай гэдгийг хэллээ. Утааны эсрэг жагсаалын анхны зар 10 орчим хоногийн өмнө гарсан. Нийгмийн сүлжээнд анхлан гарсан энэ уриалга хүрээгээ тэлж өнөөдөр энэ хэмжээний жагсаал хийх эхлэл болсон.

Гэсэн хэдий ч нийгмийн сүлжээнд буюу зөвхөн фэйсбүүкт 20 мянга хүрсэн дэмжигчидтэй ч талбайд 200 хүрэхгүй хүн цуглаад байна.

Нэг хүүхдийн ээж Солонго утааны эсрэг жагсаал үр дүнд хүртэл явна гэдгээ хэлж байна.

Хаалтын үгийг жагсаал зохион байгуулагч Ц.Пүрэвхүү үг хэлж байна. Жагсаал зохион байгуулагчид хэдий хүйтэн ч зорин ирж, хоёр цагийн турш хамтдаа байсан хүмүүст талархал илэрхийлсэн юм. Хэн нэгний эрх ашгийг хамгаалж байгаа хэрэг биш бөгөөд ээж, аавуудын дуу хоолой гэдгийг хэлсэн юм.

УИХ-ын Өргөдлийн байнгын хороонд өргөдөл өгөхөөр жагсаалын үеэр гарын үсэг цуглуулсан. Хэрэв гарын үсэг 900 давбал, энэ асуудлыг хэлэлцэх боломжтой юм. Та өөрийн биеэр дээрх өргөдлийг бөглөх боломжгүй бол ЭНД дарж цахимаар бөглөх боломжтой.

Ийнхүү "Утааны эсрэг ээж, аавуудын холбоо"-ноос зохион байгуулсан жагсаал өндөрлөж байна. Тэд шаардлагаа холбогдох байгууллагуудад хүргэж, хариуг хэвлэл мэдээллийн хэрэгслээр дамжуулан иргэдэд хүргэнэ гэдгээ хэллээ.