Колумбийн шинэ ерөнхийлөгч Хуан Мануэл Сантосын тангараг өргөх ёслол болов. Уг ёслолд тивийн 15 орны ерөнхийлөгч болон зочид, төлөөлөгчид оролцсон байна.

Ерөнхийлөгч Мануэл Сантос хэлэхдээ "Би авлигыг зогсоох талаар бүх арга хэмжээг хэрэглэнэ. Мөн баруун бүсийн хар тамхины бүлэглэлүүдтэй идэвхтэй тэмцэнэ. Колумбийн тухай муу асуудлуудыг цайруулах хэрэгтэй юм" гэжээ.

Түүний үзэж буйгаар тус улсын удирдах, тэр дундаа шүүх байгууллага хамгийн их авлигатай байдаг гэнэ. Жишээлбэл, зүүн хойд бүсийн шүүгч Начио Ивара "Иля" зэвсэгт бүлэглэлээс 50 мянган ам.доллар авсан нь илэрч, улмаар шүүх түүнд 25 жилийн ял оноосон байна. Мөн бүсийн шүүгч Хорхи Мария "Сан телеком" компанийн хэргийг хуулийн дагуу шийдвэрлээгүй. Тус компаниас 15 мянган ам.доллар авсан нь гэрчийн мэдүүлгүүдээс илэрсэн аж. Түүнд Колумбийн шүүх 16 жилийн хорих ял оноожээ. Энэ мэт жишээ тус улсад олон гэнэ.

Ерөнхийлөгч Мануэл Сантосын судалгаагаар тус улсын иргэд авлигыг зогсоохыг хүссэн аж. Тиймдээ ч ерөнхийлөгч авлигыг үйл ажиллагааныхаа гол болгосон байна. Тэрбээр шийдвэрлэгдсэн авлигын хэргүүдтэй танилцаж, хуулийн дагуу шийдвэрлэсэн эсэхийг шалгах аж. Түүнд энэ тухай 1500 гаруй хуудас бүхий хэргийн материал бий гэнэ. Түүний хамгийн эхний ажил нь шүүгчдийг 15 хоног сургалтад суулгах юм. Учир нь авлигыг зогсоохын тулд шүүгч нар ёс зүйн өндөр мэдлэгтэй байх хэрэгтэй. Ингэснээр авлигыг тэвчиж чадах аж. Ерөнхийлөгч үүний сацуу шүүгчийн цалинг хоёр дахин нэмэх талаар бодлого хэрэгжүүлэх cypaгтай. Цалин нэмэгдсэнээр авлигаас ангид байх боломжтой гэнэ.
Тэрбээр авлигын эсрэг бодлогыг ирэх жилээс эхлэн цагдаа, төрийн үйлчилгээний байгууллагуудад хэрэгжүүлэхээр төлөвлөжээ.

Колумби хар тамхины бүлэглэлгүй болно
Ерөнхийлөгчийн хийх гол ажлуудын нэг нь хар тамхины бүлэглэлүүдтэй тэмцэх юм. Тэрбээр энэ тухай хэлэхдээ "Бид энэ байдлаараа бол удахгүй Мексикийн төвшинд очиж магадгүй. Тэгэхээр тэдгээр бүлэглэлтэй тэмцэхийн тулд хөрш орнуудтайгаа харилцаагаа сайжруулах нь зөв. Мөн иргэд ямар нэгэн дарамт шахалтыг бодохгүйгээр цагдаагийн байгууллагад хар тамхины бүлэглэлийн талаарх мэдээллийг цаг тухай бүрт нь өгөх хэрэгтэй байна. Ингэснээр бид аюулгүй орчинд амьдрах юм" хэмээн онцолжээ.

Тус улсад жилд дунджаар 2000 гаруй иргэн хар тамхины бүлэглэлүүдийн гарт амиа алддаг гэх тоо гарсан байна. Үүний 50 гаруй хувь нь 23-38 насны эрэгтэй. Харин 20 гаруй хувь нь 12-18 насны хүүхдүүд аж. Дээрх тоо жил ирэх тусам нэмэгдэх хандлагатай байгаа юм. Тиймээс ерөнхийлөгч энэ байдлыг зогсоохын тулд армийн албан хаагчдынхаа тоог нэмэх бодлого баримтлах гэнэ. Мөн үүний сацуу зэвсэг, техникийг шинэчлэх аж.

Тивийн улсуудтай хамтын ажиллагаа эрчимжүүлнэ
Колумбийн хуучин ерөнхийлөгч Алверо тивийнхээ бодлогыг шүүмжилдэг байсан. Энэ нь тус улсын нэр хүнд тивийн улсуудад унахад хүрсэн гол шалтгаан нь аж. Тиймээс тивийнхээ бодлогод нэгдэх хүсэлтэй байгаагаа шинэ ерөнхийлөгч Мануэл Сантос илэрхийлжээ.

Тус улстай харилцаа муутай байсан Венесуэлийн ерөнхийлөгч Уго Чавес баярлаж байгаагаа ерөнхийлөгчийн тангараг өргөх ёслолын үеэр захидлаар илгээжээ. Захидлыг түүний төлөөлөгч уншиж, сонордуулсан байна. Уг захидалд "Олон жилийн муу бодлоо ардаа элээх гэж байгаад баяртай байна. Хоёр улс хийгээд тивийн харилцаанд ач холбогдол өгч байгаад талархал илэрхийлье" хэмээжээ.

Д.Түвшинтөр http://www.niigmiintoli.mn/