Монгол Улс болон Америкийн Нэгдсэн Улсын Засгийн газрын хооронд байгуулсан “Хүүхэд хамгааллын түншлэлийн компакт гэрээ”-ний хүрээнд “Монгол Улс дахь хүүхэд хамгааллын тогтолцооны зураглал” судалгааны тайланг олон нийтийн хүртээл болгоход бэлэн болоод байна.

Дэлхийн Зөн Монгол ОУБ нь Хүүхэд хамгааллын тогтолцооны зураглал судалгааг анх 2014 онд хийж байсан бөгөөд тухайн үед хийгдсэн судалгаа нь 2016 оны Хүүхдийн эрхийн тухай, Хүүхэд хамгааллын тухай хуулиудыг шинэчлэн боловсруулах, батлуулахад судалгааны чухал эх сурвалжийн нэг болон ашиглагдаж байсан билээ.

Тус тайлангаас хүүхэд хамгааллын тогтолцооны давуу болон сул талуудтай танилцах боломжтойн зэрэгцээ цаашдын үйл ажиллагаагаа төлөвлөх, хэрэгжүүлэхэд хэрэгцээтэй өргөн хүрээний мэдээллийг авах боломжтой.  

Харин энэ удаагийн судалгаа нь “Хүүхэд хамгааллын тухай хууль”-ийн шинэчилсэн найруулгыг боловсруулж буй цаг үед гарч байгаагаараа онцлогтой. 

Хүүхэд хамгааллын тогтолцооны зураглалыг Дэлхийн Зөн байгууллагын олон улсад хэрэглэдэг ADAPT (Analysis, Design and Planning Tool) буюу дүн шинжилгээ, боловсруулалт, төлөвлөлтийн аргачлалаар хийж гүйцэтгэлээ. Энэхүү аргачлал нь үндэсний болон орон нутгийн түвшний хүүхэд хамгааллын албан ба албан бус тогтолцоог бодлого, хууль тогтоомж, үйлчилгээ, үйлчилгээ үзүүлэх механизм, чадавх нөөц, зохицуулалт, уялдаа холбоо зэрэг талаас нь судалдаг аргачлал юм.  

Тус тайлангаас Монгол Улс дахь хүүхэд хамгааллын тогтолцооны давуу болон сул талуудтай танилцах боломжтойн зэрэгцээ шийдвэр гаргагчид, судлаачид, Монгол Улсад хүүхэд хамгааллын тогтолцоог бэхжүүлэх чиглэлээр ажиллаж буй оролцогч талууд цаашдын үйл ажиллагаагаа төлөвлөх, хэрэгжүүлэхэд хэрэгцээтэй өргөн хүрээний мэдээллийг авах боломжтой юм.  

Дэлхийн Зөн Монгол ОУБ нь үндэсний хүүхэд хамгааллын тогтолцоог бэхжүүлэх, хүүхдийн эрх, хүүхэд хамгааллын хуулийн хэрэгжилтийг сайжруулах, хүүхэд хамгааллын тогтолцоон дахь оролцогч талуудын чадавхыг нэмэгдүүлэх чиглэлээр Монгол Улсын холбогдох яам, агентлаг, орон нутгийн засаг захиргаа, хувийн хэвшил, иргэний нийгмийн байгууллагууд болон орон нутагтай хамтран ажилласаар ирсэн билээ.

Хүүхэд бүрийн сайн сайхны төлөөх бидний энэхүү зорилгод хамтран ажилладаг та бүхний маань цаашдын ажилд “Монгол Улс дахь хүүхэд хамгааллын тогтолцооны зураглал” судалгааны тайлан тодорхой дэмжлэг болж, хувь нэмэр оруулна гэдэгт итгэлтэй байна. 

СУДАЛГААНЫ ТАЙЛАНГ  ЭНДЭЭС АВНА УУ.

ТА ХҮҮХДИЙН ЭСРЭГ ХҮЧИРХИЙЛЭЛТЭЙ ТЭМЦЭХ АЯНД НЭГДЭХ ҮҮ?

Нэгдэхийг хүсвэл Change.org сайт дахь уриалгад SIGN товч дээр дарж саналаа өгнө үү.