E-Sport-ын дэлхийн хамгийн том компани болох ESL (Electronic Sports League)-ын CSGO-ын 42 дахь удаагийн "ESL Challenger League"-ын Ази-Номхон далайн бүсийн тоглолтууд өндөрлөлөө.

Наймдугаар сард эхэлсэн лигийн тэмцээнд Монголын IHC Esports, Aravt, Mazaalai, Team Renewal, Clutch Gaming болон монгол тоглогчтой D13, Team NKT багууд Хятад, Тайвань, Тайланд, Малайз, Филиппин, Хонконг, Солонгос тоглогчидтой өрсөлдсөн.

Тэмцээний финалын тоглолт өчигдөр болж IHC Esports баг Хятадын Lynn Vision багт 3-1 (Дээд хүснэгтээс финалд хүрсэн тул автоматаар 1 хожил, 19-15, 12-16, 16-12) харьцаагаар хожигдлоо.

Улмаар Lynn Vision баг CSGO-ын хамгийн том лиг болох "ESL Pro League"-ын 17 дахь улиралд оролцох эрхийн төлөөх урьдчилсан шат буюу "ESL Pro League Conference Season 17"-д орох ганц эрхийг авлаа.

Харин IHC Esports баг хоёрдугаар байрын 5000 ам.долларын шагналыг авч дараа улирлын буюу 43 дахь удаагийн ESL Challenger League-т орох эрхээ авсан байна.

Тэд энэ жилийн Риогийн Мажорт орох эрхээ авснаар хоёр жил дараалан Major Sticker-ээ гаргаад байгаа юм.

"ESL Pro League"-ын 2022 оны 16 дахь улиралд Францын "Team Vitality" баг түрүүлж 200 мянган ам.долларын шагнал, 2022 оны Blast World Final болон 2023 оны Катовице мастерс тэмцээнд орох эрхээ авсан юм. 2022 оны Катовице мастерс тэмцээнд Америкийн "Faze Clan" баг түрүүлж 400 мянган ам.долларын эзэн болсон.