Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Австри Улсын Ерөнхийлөгч Александр Ван дер Беллен 2025 оны 05 дугаар сарын 25-28-ны өдрүүдэд төрийн айлчлал хийнэ.

Айлчлалын үеэр төрийн тэргүүн нар албан ёсны хэлэлцээ хийж, харилцаа, хамтын ажиллагааг өргөжүүлэх, эдийн засаг, хөрөнгө оруулалт, уур амьсгалын өөрчлөлт, цөлжилттэй тэмцэх зэрэг даян дэлхийн тулгамдсан асуудлуудыг шийдвэрлэхэд хамтын хувь нэмрээ оруулах, тогтвортой хөгжлийн зорилтуудыг хангах зэрэг чиглэлээр ярилцана.

Айлчлалын үеэр Монгол-Австрийн Хамтарсан тунхаглал болон харилцаа, хамтын ажиллагааг нийгмийн хамгаалал, санхүү, ашигт малтмал, шинжлэх ухаан, соёл, урлаг зэрэг салбарт гүнзгийрүүлэхтэй холбоотой баримт бичгүүдэд гарын үсэг зурж, хэвлэл мэдээллийн байгууллагын төлөөлөлд мэдээлэл өгнө.

Монгол Улс, Бүгд Найрамдах Австри Улсын хооронд 1963 оны 07 дугаар сарын 01-ний өдөр дипломат харилцаа тогтоосон. Бүгд Найрамдах Австри Улсын төрийн тэргүүн манай улсад анх удаа айлчлах юм.

Ташрамд мэдээлэхэд, Александр Ван дер Беллен нь ажилдаа метрогоор явдаг, хотоор ямар ч хамгаалалтгүй алхаж, тэжээвэр амьтныг хайрладаг гэдгээрээ Австридаа төдийгүй дэлхийд нэр хүндтэй. Ковидын хөл хорионы үеэр эхнэрийнхээ хамт нэг ресторанд хооллосон. Тухайн үед бүх ресторан нь 23:00 цагт хаах ёстой байтал шөнө дунд хүртэл сууж хорио цээрийн журам зөрчсөн гэж түүнийг буруутгаж байжээ. 

Александр Ван дер Беллен энэ үйлдэлдээ олон нийтээс уучлалт гуйж, дэглэм тогтоосноос хойш анх удаа гадуур гарсан, ингэхдээ хэтэрхий удаан суугаад цаг хэд болж байгааг мартаж орхиж. Энэ миний алдаа, ресторанд торгууль ногдуулбал би түүнийг төлнө (30,000 €) гэж мэдэгдэж байжээ.

Александр Ван дер Беллены тухай "Иргэдийнхээ дунд алхаж яваа Австрийн Ерөнхийлөгч" гарчигт өмнөх мэдээг ЭНД-ээс унших боломжтой.