Аливаа уран бүтээл бүрийн цаана нийгэмд, хувь хүнд хандсан сайн зүйлс оршсоор байдаг. Уйлуулж, инээлгэж, айдаст автуулах хэдий ч цаана нь ухаарал, утга учир оршиж байдаг учраас кино урлаг хамгийн агуу нь.

Монголын кино урлаг шинэ шатанд гарч байгааг илтгэх олон сайхан кино үзэгчдийн мэлмийг баясгаж, оюуныг цэнэглэсээр байгаа нь сайшаалтай.

Мөрөөдөл гэдэг мөд, бүр хэзээ ч хүрэхгүй зүйлийг хэлдэг гэдэг. Бид мөрөөдөөд л байх юм бол тэр зүйл хэзээ ч биелэхгүй. Харин зориглоод зорилгоо болговол болохгүй бүтэхгүй зүйл гэж үгүй.

Цаг хугацаа хичнээн өнгөрсөн ч зүрх сэтгэлд үлдсэн тэр зорилгынхоо төлөө зүтгэж буй залуусын тухай өгүүлэх нэгэн шинэ уран бүтээл энэ баасан гарагт үзэгчдийн хүртээл болох гэж байгааг дуулгахад таатай байна.

Мөрөвчтэй өргөн жийнс, араб алчуур, толгойн алчуур, урт үс гээд л дурсамжаар аялуулж, дуулуулж, бүжиглүүлэх, мөн таны мөрөөдсөөр байгаа тэр зүйлийг зорилго болох боломжтойг батлах “Одод болохын хүслэн” киноны зургуудаас сонирхуулж байна.