Нүүрснээс шингэн түлш үйлдвэрлэх үйлдвэрийн төсөлд “Эрдэнэс Монгол” компани АНУ-ын “Поларис Ассет” корпорацитай хамтран ажиллахаар болжээ. Урьдчилсан байдлаар 1.1 тэрбум гаруй ам.долларын хөрөнгө оруулалттай энэхүү төсөлд мөн “Вүүд” групп, “Женерал Электрик” компани хамтрах юм байна. Урьдчилсан тооцооноос харахад нүүрснээс өдөрт 10 мянган баррель шингэн түлш үйлдвэрлэнэ гэж үзвэл жилд ойролцоогоор 269,5 сая ам.долларыг Монголын эдийн засагт хэмнэх боломжтой талаар “Эрдэнэс Монгол” компани мэдээллээ.

Тус үйлдвэр нь 100-150 МВт эрчим хүч гаргах хүчин чадалтай байхаар тооцоолжээ. Харин технологийн хувьд “Fischer-Tropsch” процесс буюу байгальд хор хөнөөлгүй технологи ашиглах юм байна. Гурван жил хагасын хугацаанд хэрэгжих энэхүү төслийн талаар “Эрдэнэс Монгол” компанийн гүйцэтгэх захирал Ц.Түмэнцогт “Монголын эдийн засгийн тогтвортой хөгжлийг хангахаас гадна түлш, эрчим хүчний хараат бус байдал цаашлаад үндэсний аюулгүй байдалд дэмжлэг үзүүлэх чухал ач холбогдолтой” гэж онцолсон юм.

Төслийн хүлээгдэж байгаа эдийн засгийн өгөөжийг харвал, үйлдвэрээс гарах бүтээгдэхүүний 25 хувь нь бензин, 75 хувь нь дизель түлш болон бусад дайвар бүтээгдэхүүн байна. Дайвар бүтээгдэхүүнийг үйлдвэр дахин ашиглаж, борлуулах боломжтой талаар төсөл хэрэгжүүлэх талууд мэдээллээ.

Б.Цацралт