“Өдрийн шуудан” сонины 2013 оны 08 сарын 02-ны баасан гаригийн дугаарт “Захирлаа хүлээсэн эзгүй айл хавдар судлал” нийтлэлд цацраг туяатай улсын онцгой бүс-Хавдар судлалын үндэсний төвийн хашаанд “Жигүүр гранд” группийг барилга барьж байна хэмээн ташаа мэдээлсэн. Энэхүү ташаа мэдээг эх сурвалжаа болгон “Улс төрийн тойм” сонин 2013 оны 08 сарын 06-ны өнөөдрийн дугаартаа ““Жигүүр гранд” цацраг идэвхижилттэй бүсэд барилга барьж байна” нийтлэлийг тус тус нийтэллээ.

Манай компанийн хувьд Баянзүрх дүүрэг дээр барьж байгаа нэг ч барилга байхгүй. Бидний олж мэдсэнээр энэхүү барилга нь хувь хүний барилга байна.

“Улс төрийн тойм”сонины нийтлэлд манай компанийг барилгын компаниудад олгосон Засгийн газрын хөнгөлөлттэй зээлд хамрагдсан, үүнээс болж үнээ өсгөсөн гэсэн ташаа мэдээллийг мөн дурджээ. Бид энэхүү мэдээллийг 2013 оны 07 сарын 10-ны өдрийн gogo.mn, news.mn сайтуудад няцаалт тавьж няцаасан.

“Жигүүр гранд” групп 1997 оноос хойш төрөөс зарлагдсан нэг ч тендерт оролцолгүй, өөрсдийн бор зүрхээр яваа компани гэдгийг энд дахин сануулмаар байна.

Эдгээр ташаа мэдээлэлдээ дээрх хэвлэл мэдээллийн хэрэгслүүд дүгнэлт хийн залруулна гэдэгт итгэлтэй байна.