АНУ-ын Төрийн нарийн бичгийн дарга Марко Рубио дэлхий даяарх АНУ-ын элчин сайдын яамдад оюутны визийн ярилцлагын цаг товлохыг түр зогсоох чиглэл өгсөн.

Энэхүү түр хориг нь виз мэдүүлэгчдийн цахим хаягт суурилсан нарийвчилсан хяналтын тогтолцоо нэвтрүүлэхтэй холбоотой гэж тайлбарласан.

Энэ талаар Монгол дахь АНУ-ын Элчин сайдын яамнаас тодруулахад "Дотоод харилцааны талаар тайлбар өгөх боломжгүй. Виз мэдүүлэгчид өргөдлөө үргэлжлүүлэн өгч болно. Консулын хэлтсүүд өргөдлийг бүрэн шалгах хангалттай хугацааг тооцож, цагийн хуваариа тогтмол өөрчилдөг" гэсэн мэдээллийг өглөө. 

Түүнчлэн Трампын засаг захиргаа үндэсний аюулгүй байдал, олон нийтийн аюулгүй байдлыг дээд түвшинд хамгаалах зорилгоор визийн үйл явцыг ашиглан эх орон болон иргэдээ хамгаалахад анхаарч байна.

Визийн шийдвэр нь үндэсний аюулгүй байдлын хүрээнд гардаг. АНУ-д зорчихоор төлөвлөж буй иргэн тус бүр агентлаг хоорондын аюулгүй байдлын шалгалтад ордог.

Цагаачлалын бус визийн ярилцлагын товыг тогтоох үйл явц динамик шинжтэй. Элчин сайдын яам эсвэл консулын хэлтсийн хүчин чадал нь тухайн газар байгаа өргөдлүүдийг хуулийн дагуу бүрэн шийдвэрлэхэд шаардагдах хугацаанд үндэслэдэг бөгөөд энэ нь АНУ-д аюулгүй байдал, эрсдэл учруулахгүй байхыг баталгаажуулахад чиглэдэг.

2019 оноос хойш Төрийн департамент виз мэдүүлэгчдээс нийгмийн сүлжээний мэдээллээ өгөхийг шаардаж ирсэн. Бид визийн шалгалт, нягтлан үзэхэд боломжтой бүх мэдээллийг ашигладаг. Визийн төрөл, байршлаас үл хамааран бүх мэдүүлгийг нягт шалгадаг. Энэ шалгалт мэдүүлэг өгсөн үеэс эхлэн визийн шийдвэр гарах, түүнчлэн визийн хүчинтэй байх хугацаанд үргэлжилдэг. Ингэснээр тухайн хүн АНУ-д зорчих эрхтэй хэвээр байгааг баталгаажуулдаг гэв.