Казахстаны Шымкент хотод наймдугаар сарын 15-30-нд зохион байгуулагдаж буй буудлага спортын Азийн аварга шалгаруулах тэмцээнд Монголын 30 тамирчин гурван насны ангилалд өрсөлдөж байна.

Насанд хүрэгчдийн эрэгтэйчүүдийн сонгомол гар бууны 50 метрийн дасгалд Үндэсний шигшээ багийн тамирчин, ОУХМ Э.Даваахүү хүрэл медаль хүртлээ. Тус дасгалд Ираны тамирчид эхний хоёр байрыг эзэлсэн байна.

Монголын буудлага спортын түүхэнд Ази тивийн анхны медалийг 1987 онд гавьяат дасгалжуулагч Л.Ундралбат сонгомол гар бууны 50 метрийн дасгалд (хүрэл медаль) хүртэж байсан бол, тивийн анхны алтан медалийг гавьяат тамирчин Д.Мөнхбаяр 1991 онд хүртэж байжээ.