GoGo.mn-ий сурвалжлах баг Офицеруудын ордны автобусны буудлаас мэдээллийг шууд дамжуулж, нийтийн тээврийн хүрэлцээ хэр байгаа талаар иргэдийн санал сэтгэгдлийг хүргэж байна.

Нийслэлд өдөрт 980 тээврийн хэрэгсэл, 97 чиглэлд үйлчилгээ үзүүлдэг гэсэн тоон мэдээлэл бий.

Нийслэлийн Тээврийн газрын хянагч "Автобуснууд боломжоороо иргэдэд үйлчилдэг.  Гэхдээ нийтийн тээврийн хүрэлцээнд түгжрэл маш их нөлөөлж байгаа. Мөн зарим автобусны эх авалт оройтдог.

Картаа цэнэглэх тал дээр 40-45 насныхан тааруу ханддаг. Өндөр настнууд хэл амаар доромжилдог. Жолооч нар мөн харилцаандаа анхаарах нь зүйтэй байгаа" хэмээн ярив.

Зорчигчдын үгээс:

-Би ТЭЦ-III" чиглэлийн автобусыг хүлээгээд 20 гаруй минут болж байна. "Таван шар"-ын автобус ганц нэгхэн л ирлээ. Автобусны хүрэлцээ маш муу байна. Автобус ирсэн ч багтахгүй, үлдэх тохиолдол ч бий.

-Зайсан чиглэлийн автобус цаг гаруй хүлээлгэж байна. Төмөр замын урдуур чиглэл гаргах хэрэгтэй. Үгүй бол Улаанбаатар хот буруу төлөвлөгдсөн тул бүх автобус төв зам дээрээ очоод түгжирчхээд байна.