Олон тооны мал хулгайлсан гэх иргэдэд холбогдох хэргийн шүүх хуралдаан Хэнтий аймгийн Бор-Өндөр сум дахь Сум дундын эрүүгийн шүүхэд өнөөдөр 10.00 цагт болно.

Эргэн сануулахад, Л.Г, Ц.Т, Б.Д нарт холбогдох хэргийн давж заалдах шатны шүүх хуралдаан энэ оны наймдугаар сард болсон. Улмаар ээ хэргийг анхан шатны шүүх дахин хэлэлцэх шийдвэр гарсан билээ. Мөн хэрэгт холбогдсон гэр бүлийн гишүүдийг дараагийн шүүх хурал хүртэл батлан даалтад гаргасан юм.

Анхан шатны шүүхээс Г, Т нарыг олон тооны малыг бүлэглэн хулгайлах гэмт хэрэг үйлдсэн буруутайд тооцож, Г-д 2 жил 6 сар, Т-д 2 жилийн хорих ял оногдуулаад байсан юм. Гэвч олон тооны мал биш хонь нийлэх үед андуурал гарч, найман ишиг дутсан гэх асуудлыг шүүгдэгч талаас гаргаснаар энэ хэрэг олны анхаарлыг татаад буй юм.

Шүүх хуралдаан үргэлжилж байна. Шүүх хуралдааныг Шүүхийн ерөнхий зөвлөлийн цахим хуудсаар шууд дамжуулж байгаа юм.

Шүүгдэгч нарын өмгөөлөгч энэ удаагийн хуралд тэднийг гэмт хэрэг үйлдээгүй гэдгийг нотолж, цагаатгах байр сууринаас оролцоно гэдгээ мэдүүллээ.

Шүүх хуралдааны хэлэлцүүлэг 15:40 цагт дуусаж, улсын яллагч гэм буруугийн дүгнэлтийг танилцуулж эхэллээ.

Прокурор "Шүүгдэгч Г, Т нар нь 56 буюу олон тооны малыг эзэмшигчийг нь мэдсээр байж ногоон өнгийн будгаар шинээр будаж, хуучин цэнхэр өнгийн будгийг дарж, тээврийн хэрэгсэл ашиглан бүлэглэн хулгайлж бусдад хохирол учруулж мал хулгайлах гэм буруутайд,

Шүүгдэгч Д нь тухайн малыг гэмт хэргийн замаар олсныг мэдсээр байж нуун далдалсан. Мөн үлдсэн 8 тооны ишгийг машин, механизм ашиглан айлд хүргэж “Намар авна” гэж хэлж, хууль бус эх сурвалжийг нуун дарагдуулж мөнгө угаах гэмт хэрэг үйлдсэн гэм буруутайд тооцох саналтай байна” гэв.

Хохирогчийн өмгөөлөгчийн зүгээс “Миний үйлчлүүлэгч шүүгдэгч Д-ийн өндөр настай, шүүгдэгч Г, Т нарын бага насны хүүхэдтэй нөхцөл байдлыг харгалзан үзэж хамгийн хөнгөн ял оноож, шийдвэр гаргахыг хүсэж байгаа. Мөн гомдолгүй гэдгээ албан ёсоор хэлж байна” гэлээ.