Онцгой байдлын ерөнхий газрын Эрэн хайх, аврах салбарын аврагчид "Өвлийн улиралд усны гүнд эрэн хайх, аврах ажиллагаа"-ны сургалт бэлтгэлийг энэ сарын 13-15-ны хооронд хийжээ.

Нийт 20 аврагч усчин Төв аймгийн Алтанбулаг сумын нутагт "Хилэм ОСТ" ХХК-ны загас үржүүлэх нууранд 15 цагийн шумбалт хийж мэргэжлийн ур чадвараа ахиулан ажилласан байна.

Тус сургалтаар:

• Мөс цөмөрсөн үед нэрвэгдэгч дээр хүрч очих, түүнийг татан гаргах,
• Нимгэн мөстэй үед гарын доорх материал ашиглан нэрвэгдэгчийг уснаас татан гаргах,
• Живсэн автомашинд холболт хийж түүнийг татан гаргах,
• Олсны хамгаалалттай 6-8 метрийн гүнд шумбалт хийх /аюулгүйн зогсолтууд хийх, даралт тэнцүүлэх, 2 аврагч зуултуур солилцох, нүдний шилэнд орсон усыг гаргах/,
• Усны гүнд шумбагч олсны дохиогоор явах, зүг чиг олох, усны гүнд байгаа нэрвэгдэгчийг эрэн хайж, аврах уяа зангидаж дээш гаргах ажиллагаа,
• Үзэгдэх орчин хязгаарлагдмал орчинд усны гүнд шумбах, зүг чиг тодорхойлох шөнийн шумбалт зэргээр бэлтгэл хийжээ.