Цахим орчинд түрээслүүлэхээр нийтлэгдсэн үл хөдлөх хөрөнгийг заавал өөрийн биеэр очиж үзэх; (Ихэнх тохиолдолд залилах гэмт хэрэг үйлдэж буй этгээд хуурамч зураг ашиглан олон нийтийн сүлжээнд хуурамч зар байршуулдаг)

Танд байраа түрээслэхээр танилцуулж буй этгээд нь тухайн үл хөдлөх хөрөнгийн хууль ёсны эзэмшигч гэдгийг шалгах;  (Төрийн үйлчилгээний EMongolia системээр үл хөдлөх хөрөнгийн лавлагаа авч шалгах, Нэг цэгийн үйлчилгээний төвүүдэд байрлах киоск машинаас лавлагаа авах, өөрт ойрхон Улсын бүртгэлийн байгууллагаас биеэр очиж авч болно)

Түрээслүүлэгч тал үл хөдлөх хөрөнгийн эзэмшигч нь мөн тохиолдолд түрээсийн гэрээг заавал бичгээр байгуулах бөгөөд гэрээнд дараах заалтыг тусгаж болно.

Гуравдагч этгээдийн шаардлагаар гэрээ цуцлахыг хориглоно;

Түрээслүүлэгч тал түрээсийн гэрээний хугацаа дуусахаас өмнө гэрээ цуцалсан тохиолд түрээслэгчид нэг сарын түрээсийн төлбөртэй тэнцэх хэмжээний торгууль төлнө гэх мэт.

Гэрээг заавал нотариатаар гэрчлүүлэх; (Нотариат түрээслүүлж буй этгээдээс үл хөдлөх хөрөнгийн гэрчилгээг шаардах тул танд давхар урьдчилан сэргийлэлт болно)

Мөн гэрээнд үл хөдлөх хөрөнгийг хүлээн авч, тавилга эд хогшлын тоо ширхэг, эдэлгээний байдлыг /хуучирч муудсан, эвдэрхий зэрэг/ нэг бүрчлэн бичиж, зургийг нь авч хавсарган гарын үсэг зурж баталгаажуулах хэрэгтэй. Энэ нь таны гэрээний хугацаа дуусаж түрээсийн байрыг хүлээлгэн өгөх үед үүсэж болох эрсдэлээс хамгаалах боломжтой.

Тухайн үл хөдлөх хөрөнгийн ашиглалтын төлбөрийн үлдэгдэл /ус дулаан, цахилгаан, интернэт, СӨХ/-ийг шалгуулж, үлдэгдэлтэй тохиолдолд акт үйлдэн баталгаажуулах шаардлагатай.

Мөн тухайн үл хөдлөх хөрөнгийн талаарх мэдээллийг СӨХ болон оршин суугч хөршүүдээс тодруулж асуух нь гэрээ байгуулсны дараа өөрийн хүсэлтээр гэрээг цуцлах нөхцөл байдал үүсэхээс урьдчилан сэргийлнэ.