Төв цэнгэлдэх хүрээлэнд хурдан морины уралдаанд түрүүлж, айрагдсан морьдын унаач хүүхэд, уяачдад шагнал гардуулах ёслол үргэлжилж байна.

Тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадмын хурдан их насны морьдын уралдаанд 183 хурдан их нас тоосоо өргөснөөс Ховд аймгийн Чандмань сумын харьяат Манлай уяач Б.Ерөөлтийн халтар морь түрүү магнайд хурдалсан. Манлай уяач Б.Ерөөлтийн баяр наадмын сэтгэгдлийг сонслоо. 

Тэрбээр, Улсын баяр наадамдаа анх хурдан халзан их насны морь минь гурваар давхиж байсан. Их морь хурд дагуулна гэж ярьдаг, үнэн байна. Гурваар давхиснаа нөхөж, миний унаган халтар морио өөрөө уяж түрүүлүүллээ. Маш их баяртай байна. 
 
-Хаанахын ямар угшилтай адуу вэ?
-Миний өөрийн унаган адуу. Эх нь Сүхбаатар аймгийн Онгон сумын гаралтай, эцэг нь миний унаган азарга. 

-Та энэ жил улсын баяр наадамдаа хэчнээн морь уясан бэ?
-20-30-аад морь бий. Бусдыг нь бүсийн наадамдаа уралдуулна. Морьдоо хэд хоног амрааж байгаад аль бүсийн наадамд оролцохоо шийднэ дээ. 

Монгол түмэндээ, нутгийн зон олондоо энэ сайхан хурдан хүлгийн босоо цагаан хийморь ивээж явах болтугай гэж хүсэн ерөөе гэв.