Үндэсний их баяр наадмыг зохион байгуулах хороо хуралдаж, наадмыг хөл хөдөлгөөн, бөөгнөрөл үүсгэхгүйгээр зохион байгуулахаар шийдвэрлэснээ өчигдөр зарласан. Үүнтэй холбогдуулан GoGo.mn сайт албан ёсны фэйсбүүк пэйж, твиттер болон веб хуудсаараа дамжуулан иргэдээс санал асуулга авсан юм.

Гурван платформоор явуулсан тус санал асуулгад нийт 10 мянга 241 хүн саналаа өгчээ.

24 цаг хүрэхгүй хугацаанд явуулсан вэб сайтын асуулгад 1934 хүн оролцсоноос 1140 нь наадам зохион байгуулахыг “Дэмжихгүй байна” гэсэн хариулт өгчээ.

GoGo.mn фэйсбүүк хуудсанд нийтэлсэн санал асуулгад нийт 8200 хүн саналаа өгсний 73 хувь нь дэмжихгүй байгаагаа илэрхийлжээ.  Харин 27 хувь нь наадам зохион байгуулахыг дэмжиж байна хэмээжээ.

GoGo.mn сайтын твиттерт явуулсан санал асуулгад оролцсон иргэдийн 55 хувь нь “Дэмжихгүй байна” гэсэн бол 45 хувь нь “Дэмжиж байна” гэсэн хариултыг сонгожээ.

Үндэсний их баяр наадмыг зохион байгуулах хорооны гишүүд түүх соёл, уламжлалын дархлаа болсон Үндэсний их баяр наадмаа зохион байгуулж, олон сар хорио цээрийн дэглэмд амьдарч буй ард иргэдээ хүндэтгэхийн зэрэгцээ сэтгэлзүйн дэмжлэг үзүүлж, уламжлалаа тасалдуулахгүй байх нь зүйтэй. Иймд иргэдийн бөөгнөрөл, цугларал үүсгэхгүйгээр, халдвар хамгааллын дэглэмийг сайтар мөрдөн Үндэсний их баяр наадмаа цомхон зохион байгуулах нь зөв хэмээн үзсэн. Гэсэн хэдий ч энэ шийдвэртэй иргэд санал нийлэхгүй байгааг дээрх санал асуулгын үр дүн харуулж байна.