Монгол Улсад хүүхдийн зуслан үүсэж хөгжсөний 100 жилийн ойг тохиолдуулан “Хүүхдийн зуслан-Хөгжил 100” олон улсын онол, практикийн хурал өнөөдөр /2026.04.24/боллоо.

Хурлыг УИХ-ын гишүүн, Гэр бүл, хөдөлмөр, нийгмийн хамгааллын сайд Т.Аубакир нээж, салбарын цаашдын бодлого, төлөвлөлтийг танилцууллаа.

Форумын хүрээнд дараах гол асуудлуудыг хөндөн ярилцлаа.  Үүнд, 

• Хөвсгөл аймгийн Алаг-Эрдэнэ суманд 60 га талбайд нэг ээлждээ 1000 хүүхэд хүлээн авах хүчин чадалтай шинэ цогцолбор “Найрамдал-2” төслийн бүтээн байгуулалтын ажил үргэлжилж байна.
• Зуслангийн үйл ажиллагааг тогтвортой хөгжүүлэх зорилгоор газрын төлбөрөөс чөлөөлөх, хувьсах зардлыг олгох, дөрвөн улирлын үйл ажиллагаатай болгох асуудлыг бодлогоор дэмжинэ.
• Олон улсын хүүхдийн “Найрамдал” цогцолборт их засвар, дэд бүтцийн шинэчлэл хийх хөрөнгийг шийдвэрлээд байна.
• 2025 онд улсын хэмжээнд 56 зуслан ажиллаж, 91 мянга гаруй хүүхэд амарсан нь нийт хүүхдүүдийн 10 орчим хувьтай тэнцэж байна. Цаашид энэ хүртээмжийг нэмэгдүүлэхэд анхаарна.
• Хүүхдийн зуслангуудыг зөвхөн амралтын газар биш, STEM боловсрол, дижитал ур чадвар, сэтгэл зүйн дархлаа олгох хөгжлийн цогц төв болгон өөрчилнө.

Хуралд ОХУ, БНХАУ, Энэтхэг, Сингапур, Австрали зэрэг орны төлөөлөгчид оролцож, хүүхдийн зуслан дахь инновац, шинэ технологи, аюулгүй байдлын туршлагаасаа хуваалцлаа.

Эх сурвалж: ГБХНХЯ