АНУ-ын Төрийн департамент гадаад оюутнуудад виз олгохдоо цахим хаяг руу нь нэвтрэх эрхийг шаардах журмыг хэрэгжүүлэхээр болжээ.

Мэдэгдэлд дурдсанаар консулын ажилтнууд АНУ-ын төр, соёл, байгууллага, үндсэн зарчимд дайсагнасан байж болох бичвэр, мессеж зэргийг хянах зорилгоор виз хүсэгчийн нийгмийн сүлжээг нь шалгах юм байна.

Хэрвээ виз мэдүүлэгч энэ шаардлагыг биелүүлэхээс татгалзвал "Хууль зөрчсөн үйлдлээ нуухыг оролдож байна" гэж үзэн виз олгохоос татгалзаж болзошгүй гэнэ. 

Трампын засаг захиргаа өнгөрсөн сард гадаад оюутнуудад шинэ визийн ярилцлага товлохыг түр зогсоох шийдвэр гаргаж, тэдний цахим сүлжээний хэрэглээг илүү нарийн шалгахаар төлөвлөж байсан юм.

Хичээлийн жил эхлэхээс өмнө очоод байрлах байраа зохицуулах хугацаа нь шахуу болж буйтай холбоотойгоор олон орны оюутнууд АНУ-ын консулын газруудыг визийн ярилцлагаа хэвийн үргэлжлүүлэхийг шаардсан. 

Энэ талаар Монгол дахь АНУ-ын Элчин сайдын яамнаас тухайн үед тодруулахад "Виз мэдүүлэгчид өргөдлөө үргэлжлүүлэн өгч болно. 2019 оноос хойш Төрийн департамент виз мэдүүлэгчдээс нийгмийн сүлжээний мэдээллээ өгөхийг шаардаж ирсэн.

Бид визийн шалгалт, нягтлан үзэхэд боломжтой бүх мэдээллийг ашигладаг. Визийн төрөл, байршлаас үл хамааран бүх мэдүүлгийг нягт шалгадаг.

Энэ шалгалт мэдүүлэг өгсөн үеэс эхлэн визийн шийдвэр гарах, түүнчлэн визийн хүчинтэй байх хугацаанд үргэлжилдэг. Ингэснээр тухайн хүн АНУ-д зорчих эрхтэй хэвээр байгааг баталгаажуулдаг" гэсэн хариулт өгч байв.

Эх сурвалж: АР