Энэ сарын 21-24 ний өдрүүдэд Мерси Кор олон улсын байгууллагын Эдийн засгийн Хөгжлийн Хөтөлбөрөөс Арахангай аймгийн төвийн хүнсний захын “Хасу” нийтийн худалдааны төвийг түшиглэн  10 гаруй аймгийн захын эзэд, шинжлэгч эмч, мал эмнэлгийн хяналтын  улсын байцаагч нарыг оролцуулсан үзүүлэх сургалт, туршлага солилцох арга зүйн зөвлөлгөөн, ярилцлагыг зохиосон нь хүнсний бүтээгдэхүүний хадгалалт, хамгаалалтыг сайжруулах, аюулгүй байдлыг дээшлүүлэхэд чухал нөлөөтэй болов. Өвөрхангай, Баянхонгор, Говь-Алтай, Завхан, Ховд, Дундговь, Өмнөговь, Сүхбаатар, Увс зэрэг 11 аймгийн хүнсний зах, мал эмнэлгийн улсын байцаагч нар оролцсон сургалт зөвлөлгөөнийг Мерси Корийн эдийн засгийн хөтөлбөрийн ажилтан С.Энхтуяа, Г.Баярхүү, Архангай дахь төлөөлөгч Э.Дашзэвэг, МХЕГ-ын улсын ахлах байцаагч  Б.Болдбаатар, МЭХ,эрүүл ахуйн лабораторийн эрхлэгч С.Лхагвасүрэн нарын мэргэжилтнүүд удирдаж, “Хасу” худалдааны төвийн үйл ажиллагаанд тулгуурлан сургалтыг хийсэн нь ажил хэргийн ач холбогдолтой боллоо.

Мерси Корийн хөтөлбөрөөс Уг хүнсний захын мах, сүү цагаан идээ борлуулдаг ажлын байруудыг хөргөгч, сав суулга, тоноглолоор хангаж тохижуулсан нь хүнсний бүтээгдэхүүний хадгалалт, аюулгүй байдлыг хангахад  чухал дөхөм болж байгаа  юм. Бас 2 жилийн өмнө тус захад мах сүү, цагаан идээний дээжийг шинжлэх жижиг лаборатори байгуулж өгсөн нь бусад аймгийн захуудад үлгэр загвар болжээ.        

Энэхүү  сургалт зөвлөлгөөн нь хүнсний барааны стандартын шаардлагад тавих хяналт, хамтын ажиллагааг бэхжүүлэх, чанарыг богино хугацаанд шинжлэх боломж, цаашид аймгуудын хүнсний захын дэргэд мал нядалгааны жижиг цэг байгуулах, ангилан зэрэглэх, савлах технологи нэвтрүүлэх арга зүйг тодорхойлж хамтран ажиллах төлөвлөгөө гаргалаа.