Манай улс дахь хөрөнгө оруулалтын орчныг сайжруулах, хувийн хэвшлийг хөгжүүлэх зөвлөлдөх хуралдаан өчигдөр Төрийн ордонд болж өндөрлөлөө. Хуралдааныг Монгол Улсын Ерөнхий сайд, Зөвлөлдөх зөвлөлийн дарга С.Баяр болон Европын сэргээн босголт, хөгжлийн банкны Тэргүүн дэд ерөнхийлөгч Варел Фрийман нар хамтран даргалав. Харин хуралдаанд манай хувийн хэвшлийнхэн, АНУ болон Япон улсын Элчин сайд нар, олон улсын байгууллагын төлөөлөл оролцсон юм.

Хуралдааны үеэр Монгол Улсын гадаад худалдаа эрхлэгчид "зовлон"-гоо тоочлоо. Тухайлбал, экспорт, импортын үйл ажиллагаа явуулдаг аж ахуйн нэгж, иргэд олон тооны бичиг баримт бүрдүүлдэг, төлбөр хураамж төлөх, олон тооны албан газар тус бүрт биеэр очин хүсэлт гарган, бүрдүүлэлт хийх зэрэг дав-талттай үйлдлээс болж цаг хугацаа алдан, зардал нэмэгддэг хэмээн хувийн хэвшлийн төлөөллийн зүгээс санал гаргаж, танилцуулга хийв.
Мөн хувийн хэвшлийнхнийг төлөөллүүдийг Ерөнхий сайд С.Баяр, хуралдааны даргад танилцуулсан өөр нэг асуудал нь Замын-Үүд боомтоор дамжуулан төмөр зам, авто замаар ачаа тээвэрлэхэд гарч буй чирэгдэл, хүндрэлийн талаар юм.

Тодруулбал, энэ хүндрэл нь улс орны хэмжээнд хохиролтой байна гэв. Харин зөвлөлийн төгсгөлд хувийн хэвшлийн төлөөлөгчид болон Элчин сайд нар, олон улсын байгууллагын тэргүүн нартай хэлэлцсэний үндсэнд худалдааны үеэр гардаг хүндрэлийг устгаж дэлхийн жишигт хүрсэн цахим нэг цонхны үйлчилгээг нэвтрүүлэхээр боллоо. Түүнчлэн Замын-Үүд боомтын тээвэр, дэд бүтцийн хоцрогдолд гарч байгаа хүндрэлийг арилгах үүргийг Сангийн сайд С.Баярцогт, Төрийн өмчийн хорооны дарга Д.Сугар нарт үүрэг болгов.

Эдгээр дэлхийн жишигт нийцсэн үйлчилгээ, арга хэмжээг өөрийн орны худалдааны салбарт нэвтрүүлэхдээ иргэд, компанид хүрэх үр өгөөжийг нэмэгдүүлэх үүднээс Засгийн газар, хувийн  хэвшлийнхэн хамтран ажиллахаар боллоо.
Харин хуралдааны төгсгөлд хувийн хэвшлийн төлөөлөгчид Элчин сайд нарт дуу хоолойгоо хүргэх боломж олгосонд Ерөнхий сайдад талархал илэрхийлсэн юм. Цаашид Зөвлөлдөх зөвлөлийн механизмаар дамжуулан Засгийн газар болон хувийн хэвшил, хөрөнгө оруулагчдын хооронд "гүүр" болж бизнесмэнүүд, хөрөнгө оруулагчийн өмнө тулгараад байгаа олон асуудал, хүндрэлийг шийдвэрлэнэ гэж найдаж буйгаа илэрхийлэв.

О.Сэлэнгэ