Эрх баригчаас орлогоо тайлагнаж, огцрохыг шаардсан иргэдийн тайван жагсаал Сүхбаатарын талбайд найман өдрийн турш үргэлжилж байна. Шаардлагыг нь хүлээж авах хүртэл жагсагчид өдөр бүр 20:00 цаг хүртэл хуулийн хүрээнд тайван жагсаалаа үргэлжлүүлэхээ мэдэгдсэн ч, аюулгүй байдлыг нь хангах хууль сахиулагчид хангалтгүй ажиллаж байна.
 
Жагсаалын долоо дахь өдрөөс эхлэн “Ухаа худгаа аваръя” гэх нэрийн дор өөр иргэд төв талбай дээр жагсаж эхэлсэн. Энэ үеэр “Огцрох амархан” жагсаалд оролцогчдыг хаших, турхирах, биед нь халдахыг завдсан тохиолдол гарсаар байна. 

Сууж байгаа жагсагчийг ардаас нь өшиглөх, түлхэх, цохих зэрэг үйлдлүүдийг иргэд баримтжуулан цахим сүлжээнд байршуулсаар. Гэвч талбай дээр байсан хоёр гуравхан цагдаа  ажиглагчийн байр сууринаас хэтэрсэнгүй.  

Жагсагчид зөрчилдөөнд хүрвэл хэрхэх, цагдаагийн алба хаагчид хэрхэн ажиллаж байгаа талаар Цагдаагийн ерөнхий газраас тодруулахад "Энэ асуудалд цагдаагийн байгууллагаас хяналт тавьж байгаа. Жагсаал цуглаан зохион байгуулагчид жагсагчдын аюулгүй байдлыг хангах, тэднийг нэгдсэн зохион байгуулалтаар хангах зохицуулалт бий" гэлээ.

Гэвч өчигдрийн жагсаалын үеэр ажиглахаас илүү анхаарах зүйлс байсан. Хуульд цагаан дээр хараар энэ зохицуулалтыг хэрхэн бичсэнийг харвал, Монгол Улсын “Жагсаал цуглаан хийх журмын тухай хууль”-ийн 13.1-д:
“Нийгмийн хэв журам хамгаалах үүрэг бүхий байгууллага нь энэ хуульд заасан журмын дагуу зохион байгуулагдаж байгаа жагсаал, цуглааны үед хэв журам хамгаалж, түүнд оролцогчдыг аливаа гэмт халдлагаас хамгаалах үүрэгтэй”  гэж заасан байдаг.

Мөн дээрх хуульд “Нэг газарт, нэгэн зэрэг хоёр ба түүнээс дээш жагсаал, цуглаан хийхийг хориглоно” гэж заасан ч, сүүлийн хоёр өдөр хуулийн энэ заалт зөрчигдөж, хяналтгүй нөхцөл үүсээд байна.